बुटवल । रुपन्देहीमा पोलियोबिरुद्धको खोप अभियान सुरु भएको छ । दुई चरण अन्तर्गत पहिलो चरणको खोप अभियान सुरु भएको हो । अभियानका क्रममा जिल्लाका करिब ७० हजार बालबालिकालाई पोलियोविरुद्धको खोप ‘आइपीभी’ दिइनेछ । स्वास्थ्य कार्यालय, रुपन्देहीका प्रमुख गौरब ढकालले अभियान अन्तर्गत जिल्लाका ६९ हजार ७ सय ६३ जना बालबालिकालाई आइपीभी खोप लगाइने जानकारी दिए ।
‘खोप अभियान आजदेखि सुरु भएको छ । यसलाई हामीले निकै व्यवस्थित गरेका छौं । कोही पनि बालबालिका नछुटुन भन्नेमा हाम्रो ध्यान छ’, उनले भने । उनलका अनुसार आज जेठ १३ देखि २३ गतेसम्म दुई चरणमा गरेर खोप लगाइने छ । खोप लगाउन रुपन्देहीमा ८ सय ५६ वटा खोप केन्द्र निर्धारण गरिएको ढकालले जनाए ।
२०७३ देखि २०७५ सम्म नियमित पोलियो खोप लगाउन छुटेका ती बालबालिकालाई यो खोप लगाउन सुरु भएको हो । जेठको १३ देखि १६ गतेसम्म पहिलो चरण अन्तर्गत बुटवल उपमहानगरपालिका, सिद्धार्थनगर नगरपालिका, लुम्बिनी सांस्कृतिक, तिलोत्तमा, देवदह, सैनामैना नगरपालिका, ओमसतिया गाउँपालिका, रोहिणी, शुद्धोधन र सियारी गाउँपालिकामा खोप लगाउन सुरु गरिएको हो ।
