राधिका भुसाल
प्यूठान
प्यूठान नगरवासीहरुले यतिबेला खानेपानीको समस्या भोग्दै आएका छन् । वृहत् बिजुवार साना–शहरी खानेपानी उपभोक्ता तथा सरसफाइ संस्थाले नियमित रुपमा खानेपानीको आपूर्ति गराउन नसक्दा उपभोक्ताहरुले लामो समयदेखि खानेपानीको समस्या व्यहोर्नु परेको छ ।
वृहत् खानेपानी नियमित आपूर्ति नहुँदा समय–समयमा निकै समस्या हुने गरेको प्यूठान नगरपालिका–४ निवासी शम्भु श्रेष्ठले बताए । ‘वृहत्ले आफ्ना उपभोक्ता माथि खेलवाड गर्दै आएको छ,’ उपभोक्ता श्रेष्ठले भने–‘केहिले पानी धमिलो आउँछ, कहिले आउँदैन ।
अहिले पनि महिना दिन भयो पानी नआएको ।’ सूचना दिएर १–२ दिन पानी नआउनु स्वभाविक नै हो तर, यसरी अस्थव्यस्त तरिकाले पानी सप्लाइ गर्नु लापरबाही नै भएको उनले बताए । पैसा तिरेर समेत नियमित रुपमा स्वच्छ पानी पिउन तथा प्रयोग गर्न नपाउनु विडम्बना नै भएको उनको भनाइ छ ।
नियमित पानी नआउँदा होटल व्यवसाय गर्नेहरुलाई झनै समस्या हुने गरेको जुम्री निवासी ऋषीराम भण्डारीले बताए । ‘एक हप्ता बढी भयो नियमित पानी नआएको,’ उनले भने–‘पैसा तिरर प्रयोग गर्ने पानी पनि आवश्यकताअनुसार पाइदैन ।’ वृहत्ले दिर्घकालिन रुपमा पानी आपूर्तिको समस्या अन्त्य गर्नु पर्ने उनको भनाइ छ । जुम्रीका अर्का उपभोक्ताले थप्दै भन्छन्–‘बिना कुनै सूचना पानी बन्द गर्ने र छोडिदिने हुँदा वृहत्ले उपभोक्ताहरुलाई धेरै झुक्काउने समेत गरेका छ ।’
दैनिक जीवनमा अत्यन्तै आवश्यक पर्ने पानी नियमित रुपमा आपूर्ति नहँुदा विशेष गरी विद्यालय जाने बालकालिका, वृद्धावृद्ध, सुत्केरी महिला, कर्मचारीलगायत सम्पूर्ण उपभोक्ताहरुले निकै समस्या झेल्नु परेको उनले बताए । प्यूठान नगरमा बृहत् खानेपानीकै भरमा पर्ने उपभोक्ताहरुलाई मागको ७० प्रतिशत मात्र खानेपानी आपूर्ति हुँदै आइरहेको उनीहरु बताउँछन् ।
उता वृहत्ले भने लामो समयको खडेरीले पानी उत्पादन कम भएपछि उपभोक्ताको आवश्यकता अनुसार पानी पु¥याउन नसकिएको बताउँछ । खडेरीले सबै मुहानहरु सुकेपछि मुख्य समस्या परेको वृहत् बिजुवार साना–शहरी खानेपानी उपभोक्ता तथा सरसफाइ संस्थाका सव–इञ्जिनियर पिताम्बर पण्डितले बताए । ‘नर्मल अवस्थामा दैनिक ८ लाख लिटर पानी उत्पादन हुने गरेको थियो,’ उनले भने–‘फागुन यता दैनिक ५ लाख लिटर पानी उत्पादन भएको छ ।’ अब वर्षात् सुरु भएकोले मुहानहरु सर्सिएपछि पानीको समस्या नहुने उनले जनाए । १ हजार ९ सय धारा वितरण भइसकेको र केही घरहरुमा धारा जडान गर्न बाँकी रहेको पण्डितको भनाइ छ ।
केही समय पहिले गेजबाङ्गगको सम्पवायल बिग्रीएर क्वाडी क्षेत्रमा धमिलो पानी सप्लाइ भएको बताउदै नयाँ सम्पवायल राखिसकेको हुँदा त्यो समस्या नदोहोरिने उनले जानकारी दिए । वृहत् खानेपानीले गेजबाङ्गगसहित बाग्दुला, टिकुरी र बिजुवार भौकाको सम्पवायलबाट पानी वितरण गर्दै आएको छ । वृहत्ले प्यूठान नगरपालिकाको वडा नं. १, २, ३, ४, ७ र वडा नं. ८ मा आँशिक रुपमा खानेपानी वितरण गर्दै आएको छ ।
