बुटवल । उजीरसिंह माध्यमिक विद्यालयका पूर्व विद्यार्थीहरु बेलाबखत जमघट भइरहन्थे । यो भेटले साथीहरुबीच हार्दिकता बढ्दै थियो । यसपल्ट उनीहरु बेलबास, बँदेलपोखरीस्थित योग गुरूङको रेष्टुरेण्टमा भेट गर्ने निधो गरे । २०४४ देखि ०४६ सम्मका ३० जना एसएलसी ब्याजी जुटे, रमाइलो गरे । तिनै मध्येका तीन जनाले बुधबार दुर्घटनामा ज्यान गुमाएका छन् ।
बेलबास बँदेलपोखरी ठाउँ रोज्नुको कारण थियो, २०४५ सालमा उजीरसिंहबाट एसएलसी दिएका गुरुङ भर्खरै सम्पन्न एमाले रुपन्देही जिल्ला अधिवेशनबाट सदस्यमा निर्वाचित भएका थिए । उनलाई बधाई दिने भन्दै जुटेकाहरुले बिदा भएको केहीबेरमा दुःखद खबर सुने ।
त्यो जमघटमा जुटेका विमलराज भट्टराईका अनुसार, दुर्घटनामा परेका छवि शर्मासहित पाँच नुवाकोट जाने भ्यू प्वाइन्टमा पुगेर फोटो खिचेर फर्कने भन्दै उकालो लागे । अरु घर तिर । फर्कदा कार दुर्घटना भयो । तीन जनाको निधन भयो, दुई घाइते भए ।
लु २ च ८५३१ नम्बरको कार दुर्घटना हुँदा बुटवल-१० का छवि शर्मा, तिलोत्तमा नगरपालिका–३ की ५७ वर्षीया आशा श्रेष्ठ र सोही ठाउँकी ५० वर्षीया भगवती श्रेष्ठको मृत्यु भयो । दुर्घटनामा परी रश्मी श्रेष्ठ र चन्दा श्रेष्ठ घाइते भए ।
नुवाकोट जाने बाटोको बुटवल भ्यू प्वाइन्ट जाने भनेर छुट्टिएका उनीहरु नुवाकोट पुगेर फर्किदा दुर्घटना भएको हो । फर्कदा ओरालो बाटोको घुम्तीमा गाडी दुर्घटना भएको हो । अप्ठारो बाटो पार गरेपछिको अन्तिम घुम्तीबाट गाडी दुर्घटना भएको हो । इलाका प्रहरी कार्यालय बुटवलका डीएसपी विजयराज पण्डितले घुम्तीमा आएपछि दायाँ मोड्नुपर्ने कार सिधा भीरतर्फ खसेको बताए । गाडी सडकबाट सय मिटर तल खसेको छ । दुर्घटनास्थल बँदेलपोखरीबाट २ किलोमिटरमा पर्छ । दुर्घटना भएपछि पुगेकाहरु उद्दार गर्न भन्दा भिडियो खिच्न थालेका थिए । सामाजिक सञ्जालमा भेटिएको भिडियोमा छविले ‘बाबु मलाई उठाउँ’, गाडी दुर्घटना भएको हो र ?’ भनेको सुनिन्छ । प्रहरीले उद्दार गरी लुम्बिनी प्रादेशिक अस्पताल ल्याएपछि डाक्टरले मृत घोषणा गरेको बताएको छ ।
उत्पादनको बजार बुझेका पात्र
छवि शर्मा कुशल बजार प्रतिनिधि थिए । २०४८ सालदेखि हिराप्रसाद श्रेष्ठको तारालक्ष्मी स्टोर्सबाट बजार प्रतिनिधि थालेका उनी पछिल्ला दिनमा विभिन्न कम्पनीमा काम गरे ।
तारालक्ष्मीमा काम गर्दै गर्दा विभिन्न कम्पनीका म्यानेजरसँग भेट भयो । त्यसपछि उनी एशियन थाई फुड्समा काम गर्न थाले । अहिले उनी त्रिमूर्ति इष्डष्ट्रिजमा काम गर्दै थिए ।
‘इमान्दार र कामप्रति लगाव थियो । बुबाले असाध्यै मन पराउनुहुन्थ्यो ।’- व्यवसायी हिराप्रसादका छोरा एंव उद्योग वाणिज्य संघका पूर्व अध्यक्ष सुरेन्द्र श्रेष्ठले भने । पहिले बुटवलमै बसेर तारालक्ष्मी स्टोर्समा काम गरेका उनी त्यसपछि बलेटक्सार बसेर गुल्मी सेक्टर हेर्थे । चाउचाउ, चुरोट, बिस्कुटको डिस्टिब्युटर्सको काम गर्ने तारालक्ष्मी स्टोर्स त्यसबेला नामी डिस्टिब्युटर्स थियो ।
एशियन थाई फुड्समा १५ वर्ष काम गरेपछि उनी उद्योगी कमल मालपानीको नजरमा परे । त्यसपछि त्रिमूर्ति इष्डष्ट्रिजमा काम गरे । सरल स्वभावका उनी उद्योगी, व्यापारी र उपभोक्ताको स्वभाव बुझेर व्यवहार गर्न सक्ने बजार प्रतिनिधि थिए । पछिल्ला वर्ष उद्योगी कमल मालपानीको विश्वासमा परेका उनलाई कम्पनीले कर्पोरेट म्यानेजरको जिम्मेवारी दिएको थियो ।
जोखिमयुक्त सडक
बुटवलको बेलबासदेखि पाल्पाको दोभानसम्म जानका लागि विकल्पको रुपमा निर्माण भएको थियो, बेलबास–नुवाकोट–दोभान सडक । यो सडकमा अत्यधिक उकालो र सवारीसाधनले थेग्नै नसक्ने गरी मोडहरू रहेका छन् । डिभिजन सडक कार्यालय बुटवलका अनुसार २०५२ सालतिर स्थानीयले आफूलाई दैनिक आवतजावत गर्न आफँै ट्र्याक खोलेको सडकलाई संघीय सरकारले बजेट दिएर केही चौडा बनाएको थियो । पछि प्रदेश मातहत गएपछि त्यसैमाथि कालोपत्रे गरिएको थियो । विज्ञ र सडक निर्माणमा लामो समयदेखि संलग्न इञ्जिनियरहरूले उक्त सडकको दुरी लामो बनाएर भए पनि जोखिम हटाउन सुझाव दिएका थिए । तर वन कार्यालयले अनुमति नदिएपछि सडक अत्यन्त जोखिम पूर्ण बनेको डिभिजन सडक कार्यालयको भनाइ छ ।
डिभिजन सडक कार्यालय बुटवलका इञ्जिनियर महेश्वर लम्सालले बुटवलदेखि नुवाकोट सम्मको दुरीलाई थप दुई किलोमिटर बढाएर भए पनि मोड, घुम्ति र उकालो घटाउने प्रयत्न गरे पनि वन कार्यालयले अनुमति नदिएपछि सम्भव नभएको बताए ।
उनका अनुसार स्थानीयले बनाएको ट्र्याकको लम्बाइलाई केही लम्बाउन पाएको भए बुटवलदेखि नुवाकोट सम्मको अहिलेको करिब ९ किलोमिटरको दुरी २ किलोमिटर बढ्न सक्थ्यो । तर मोडहरू भने अहिले रहेका ३१ बाट घटेर १० वटामा आउँथ्यो ।
अहिले उक्त सडकमा उकालो दर १५ प्रतिशतभन्दा बढी छ । अर्थात् १ सय मिटर दुरीमा १५ मिटर उकालो छ ।
रुपन्देही र पाल्पाको सिमा क्षेत्रमा रहेको ऐतिहासिक नुवाकोट बुटवलको उत्तरपश्चिम चुरे पहाडको शिरमा छ । पाल्पाली सेनवंशिय राजा मणिमुकुन्द सेनको गृश्मकालिन दरबारको भग्नावेशष, प्राचीन भैरव मन्दिर, तोपहानलगायतका संरचनाहरूका कारण नुवाकोट ऐतिहासिक क्षेत्र हो । नुवाकोटबाट बुटवल, भैरहवादेखि भारतको सुनौली र नौतनहवासम्मको सुन्दर दृश्यावलोकन गर्न सकिन्छ ।
हरियाली जंगलको चिसो हावा चल्ने नुवाकोट पछिल्लो समय घुम्न र तराईको गर्मी छल्न जानेहरूको उपयुक्त गन्तव्य बनिरहेको छ ।
पछिल्लो समय नुवाकोट विकास संरक्षण समितिले नुवाकोटमा विभिन्न संरचना निर्माण गरेपनि त्यहाँ दैनिक सयौं आन्तरिक तथा बाह्य पर्यटकहरू घुम्नको लागि पुग्न थालेका छन् ।
नुवाकोटलाई पर्यटकीय गन्तव्य बनाउन बुटवलका उद्योगी व्यवसायीहरूले होटल तथा रिसोर्ट संचालन गरिरहेका छन् भने सिद्धार्थ केबलकार प्रालिले केबलकार निर्माण गरिरहेको छ । जसको परीक्षण संचालन भइसकेको छ ।
नुवाकोट घुम्न जानेहरूको संख्या बढिरहँदा छिनछिनमै आउने मोड र अत्यन्त उकालो सडकका कारण त्यहाँ पुग्ने यात्रुहरूको यात्रा भने जोखिमपूर्ण बनिरहेको छ ।
दैनिकजसो साना तिना दुर्घटना भइरहेपनि ठूला दुर्घटना बाहेकका सूचनाहरू बाहिर आउँदैनन् । साना दुर्घटनाका सूचना बाहिर नआए पनि त्यहाँ पुग्नेहरू भने अप्ठ्यारो सडकको जोखिमबारे चर्चा गरिरहन्छन् ।
सिद्धार्थ राजमार्गअन्तर्गत सिद्धबाबा–दोभान खण्डको पहिरोको उच्च जोखिमबाट बच्नका लागि बुटवल बेलबास–नुवाकोट–दोभान सडकलाई वैकल्पिक मार्गका रुपमा अगाडि सारिएको थियो । सिद्धबाबामा पहिरो गएर घण्टौं सडक अवरुद्ध हुँदा यात्रुहरू अलपत्र पर्ने समस्याको अन्त्य गर्नका लागि यो सडक निर्माण गरिएको थियो ।
