बुटवल । बुटवल उद्योग वाणिज्य संघका सदस्यलाई लुम्बिनी केवलकारले ५० प्रतिशत छुट दिने भएको छ । लुम्बिनी केवल कार र बुटवल उद्योग वाणिज्य संघ बीचमा त्यस विषयमा समझदारी पत्रमा हस्ताक्षर भएको छ ।
लुम्बिनी केवल कारको प्रस्तावमा समझदारी गरी आइतबार हस्ताक्षर गरिएको हो । उक्त समझदारी पत्रमा संघको तर्फबाट अध्यक्ष हरिप्रसाद अर्याल र लुम्बिनी केवलकारको तर्फबाट अपरेसन म्यानेजर डिल्लीनारायण कायस्थले हस्ताक्षर गरी आदान प्रदान गरेका छन् ।
समझदारी अनुसार लुम्बिनी केवल कारले संघका बोर्डका पदाधिकारी तथा सदस्य र सक्रिय सदस्य तथा सचिवालयमा काम गर्ने कर्मचारीका लागि केवलकारको दुई तर्फी टिकट शुल्कमा ५० प्रतिशत छुटको व्यवस्था गरिएको हो ।
अहिले लुम्बिनी केवलकारको टिकट शुल्क १ हजार रुपैयाँ रहेको छ । संघमा भएको यो समझदारीपछि संघको कार्यसमितिका पदाधिकारी सदस्य, सचिवालयका कर्मचारी र संघमा नविकरण भएका सदस्यहरुलाई केवलकारको टिकटमा ५० प्रतिशत छुट गरी ५ सय रुपैयाँ लिइने छ ।
समझदारीअनुसार केवलकार टिकटमा छुट लिनको लागि संस्थाको परिचय पत्र अनिवार्य गरिएको छ । केवलकारको टिकटमा मात्रै छुट हुनेछ ।
दुबै पक्षले विज्ञापन बोर्ड वा अन्य सम्बन्धित प्रवद्र्धन सामग्रीहरु एक अर्काको परिषरमा राखेर प्रवद्र्धन गर्नेछन् । यो समझदारी एक वर्षसम्म रहने छ । आपसी सहमतिमा परिवर्तन पनि गर्न सकिने छ ।
