नवीन लोचनमगर/रोल्पा । रोल्पाको तालाबाङमा सोमबार जिप दुर्घटना भएको छ ।
माडी गाउँपालिकाको घर्तीगाउँबाट वडा नं. ३ तालाबाङतर्फ जाँदै गरेको लु १ ज ३२५२ नम्बरको जिप सोमबार बेलुका परेवा छहरा भन्ने ठाउँमा दुर्घटना भएको प्रहरीले जनाएको छ ।
जिप सडकबाट करिब चारसय मिटर तल पुगेको स्थानीयले बताएका छन् । जिल्ला प्रहरी कार्यालय रोल्पाका प्रहरी नायब उपरीक्षक भरत लामाका अनुसार दुर्घटनास्थलबाट ९ जना घाइतेलाई उद्धार गरी घर्तीगाउँ ल्याइएको छ ।
उनीहरुमध्ये केहीको अवस्था गम्भीर रहेको डिएसपी लामाले बताए । जिपमा के कति यात्रु सवार थिए भन्नेबारेमा अझै एकिन भइनसकेको प्रहरीको भनाई छ । घटनास्थलमा भिरालो ठाउँमा भएकाले अझै खोजीकार्य जारी रहेको बताइएको छ । तस्बिर बुद्धिमान ओली
