काठमाण्डौ । अरनिको राजमार्ग हिलो र लेदोका कारण अवरुद्ध भएको छ । निरन्तरको वर्षाले निर्माणाधीन धुलिखेल–खावा सडक खण्डमा पहिरो गएकाले राजमार्ग अवरुद्ध भएको हो ।
स्तरोन्नतिका लागि निर्माणाधीन सडकमा पानी परेका कारण हिलो–लेदो माटोमा मालवाहक गाडी अड्किएपछि त्यसलाई निकाल्न नसकिएको र खावा नजिक सडकमा पहिरो खसिरहेकाले राजमार्ग बन्द रहेको प्रहरीले जनाएको छ ।
पाँचखाल ५० किलोमा पहिरोले सोमवारदेखि सडक अवरुद्ध भएकोमा पहिरो पन्छाएपछि हिजो दिउँसो २ बजेदेखि दुवैतर्फी नै गाडी चल्न थालेका थिए । आज बिहानदेखि हिलो र लेदोले सडक अवरुद्ध भएको हो ।
यसैबीच पहिराले अवरुद्ध पृथ्वी राजमार्ग एकतर्फी सञ्चालन भएको छ । तनहुँको म्याग्दे गाउँपालिका–६ मौरीओढारमा बिहान पहिरो खस्दा अवरुद्ध राजमार्गमा अहिले एकतर्फी गाडी चल्न थालेका हुन् । लेदोसहितको पहिरोले याे राजमार्ग अवरुद्ध भएको थियो ।
