अनिता चौधरी 
सैनामैना 
सैनामैनाको कलौनी चोकमा गौतमबुद्ध स्मारक पार्कको निर्माण कार्य सुरु गरिएको छ । 
दुधराक्ष युवा क्लबको पहलमा सैनामैना नगरपालिका वडा नं. ६ स्थिति कलौनी चोकमा भगवान गौतमबुद्धको स्मारक पार्क बनाउन सुरु गरिएको हो ।

मंगलबार सैनामैना नगरपालिकाका मेयर फणीन्द्रप्रसाद शर्माले गौतमबुद्ध स्मारक पार्क निर्माण कार्यको शिलान्यास गरे  । उनले शान्तिको प्रतीक बुद्धको सन्देश दिन बुद्ध पार्कले लुम्बिनी र सैनामैनाको प्रचारप्रसारमा सहयोगी बन्ने बताए । 

गौतम बुद्ध स्मारकपार्कले सैनामैनालाई लुम्बिनीसँग जोड्ने  हुनाले पार्क निर्माणमा नगरपालिकाले साझेदारी गर्ने प्रतिबद्धता आवश्यक सहयोग रहने समेत नगरप्रमुख शर्माको भनाइ छ ।

उनले भने–‘पूर्वपश्चिम राजमार्ग आवतजावत गर्ने यात्रुलाई लुम्बिनी जान पार्कले प्रेरित गर्नुका साथै लुम्बिनी पुग्न यात्रीका लागि सहज हुनेछ । पर्यटकहरु सैनामैना हँदै लुम्बिनी आवतजावत गर्दा आर्थिक गतिविधि चलायमन हुने व्यापार बढ्ने, धार्मिका सहिष्णुता कायम हुने र पर्यटन विकासमा महत्त्वपूर्ण भूमिका खेल्ने छ ।’  

गौतमबुद्ध स्मारक पार्क निर्माणले सैनामैनाको आकर्षण र विकासमा ठूलो आयम थप्ने  सैनामैना नगरपालिकाका उपप्रमुख विना रानाले बताइन । उनले सबैको साझा प्रयासले सानोदेखि ठूलो काम गर्न सकिने उदाहरण  दुधराक्ष युवा क्लबले दिएको बताइन । 
लुम्बिनी प्रदेश पूर्व सांसद फकारुदिन खानले दुधराक्ष युवा क्लब यो सानो प्रयासले यस ठाउँ विकासको उचाइलाई माथि पु¥याउने विश्वास व्यक्त गरे । 

विश्वसामु परिचीत शान्तिका अग्रदुत गौतमबुद्धको जन्मस्थल लुम्बिनीलाई अध्यात्मिक र धार्मिक स्थलको रुपमा  पर्यटकहरु धर्म र यात्रा गर्न आउने हुनाले बुद्ध पार्कले सैनामैनालाई लुम्बिनीसँग जोड्दा पर्यटकहरु सैनामैनासम्म आउने वातावरण सिर्जना हुने हुनाले नगरको धार्मिक र पर्यटन विकास हुने विश्वास उनले व्यक्त गरे ।

कार्यक्रममा सैनामैना नगरपालिकाका पूर्व नगरप्रमुख चित्रबहादुर कार्की, मानवअधिकार तथा शान्ति समाजका पूर्व केन्द्रीय अध्यक्ष गोविन्द खनाल, सैनामैना नगरपालिका वडा नम्बर ६ का अध्यक्ष गोपाल पोख्रेलले बोल्दै आफ्नो ठाउँ आफैँ बनाउ भन्ने अभियानमा लाग्यौ भने पक्कै पनि सफल बनिन्छ भने एक उदाहरण दुधराक्ष युवा क्लबले स्थापित गरेको बताएका थिए । सन्देश बोकेको यस कार्यक्रमले सैनामैनाको समग्र विकासको निम्ति सबैजना एकजुुट छन् भन्ने सन्देश दिएको उनको भनाइ थियो । लुम्बिनीको नजिकमा रहेको सैनामैनाको विकासमा यो बुद्ध स्मारक पार्कले  पर्यटन विकास र समग्र सैनामैनाको विकासमा टेवा पुग्ने उनले बताए ।  

स्मारक निर्माणको लागि लुम्बिनी बिकास कोषका उपाध्यक्ष डा.ल्हारक्याल लामाले भगवान बुद्धको मूर्ति निर्माण गर्नका लागि आर्थिक सहयोग गरेका हुन् । बौद्ध स्मारकमा भगवान बुद्धको मूर्ति निर्माण गर्नका लागि १ लाख ५० हजार रुपैयाँ प्रदान समेत उनले गरेका छन् ।

२२ लाख रुपैयाँको लागतमा निर्माणको जिम्मा पाएको पर्राेहा विल्डर्सले डेढ महिनामा निर्माण सप्पन्न गर्ने दुधराक्ष युवा क्लबका अध्यक्ष किरण पोख्रेलले जानकारी गराए । 

स्मारक १८ फिटको गोलाआकारको हुने छ भने बीचमा नेपालको राष्ट्रिय झण्डासहित विश्व शान्तिका अग्रदुत भग्वान गौतमबुद्ध मूर्ति रहने छ । उक्त स्मारकको डीपीआर ई. उमेश काफ्लेले बनाएका हुन् ।
शिलान्यास कार्यक्रम क्लबका उपाध्यक्ष सुनिल पोख्रेलको  स्वागत तथा सचिव पदम पाण्डेको सञ्चालनमा सप्पन्न भएको थियोे ।