काठमाडौं । राजेश हमालको कमब्याक चलचित्रको नाम घोषणा गरिएको छ । निर्माणपक्षले थिम पोस्टर सार्वजनिक गर्दै चलचित्रको नाम घोषणा गरेको हो ।
चलचित्रको नाम ‘नरसिंहा अवतार’ राखिएको छ । पोस्टरमा राजेश हमाल भने छैनन् । थिम पोस्टरमा रातो र निलो रङ छ । यसले चलचित्रले युद्ध र शान्तिको संकेत गरेको छ ।
एक्सनप्रधान चलचित्रमा शान्तिका लागि क्रान्ति अथवा द्वन्द्व हुने थिम पोस्टरमार्फत संकेत गरिएको छ । नरसिंहाको उग्र अवतार थिम पोस्टरमा देखिनुले पनि चलचित्र द्वन्द्वप्रधान हुने स्पष्ट हुन्छ ।
निर्देशक दिवाकर भट्टराईले राजेश हमालसम्म सम्झौता गर्दा नै चलचित्र एक्सन ड्रामा हुने बताइसकेका छन् । यो चलचित्रमार्फत राजेश आठ वर्षपछि ठूलो पर्दामा देखिँदैछन् ।
