कञ्चन । रुपन्देहीको कञ्चन गाउँपालिकाले घुम्ती शिविर मार्फत टोल टोलमा गई सामाजिक सुरक्षा भत्ता लाभग्राहीको परिचय पत्र नवीकरण गरेको छ ।
एक महिनाको अवधिमा संचालन भएको घुम्ती शिविरमा कञ्चन गाउँपालिकाका ३ हजार ५ सय ४७ जनाको सामाजिक सुरक्षा भत्ता लाभग्राही परिचय पत्र नवीकरण भएको पालिकाले जनाएको छ ।
आव २०८०/८१ को चौथो किस्ता बुझने लाभग्राही ४ हजार ५ सय ३४ रहेका थिए । पालिकाले संचालन गरेको घुम्ती शिविरबाट ७८.२३ प्रतिशत लाभग्राहीहरुको नवीकरण कार्य सम्पन्न भएको कञ्चन गाउँपालिकाका पञ्जिकरण शाखाका सुरेन्द्र पोख्रेलले जानकारी दिए ।
पोख्रेलका अनुसार दलित बालबालिका २६९ जना, अति अशक्त अपाङ्ग ११७ जना, पुणर् अपाङ्ग ४२ जनाले परिचय पत्र नविकरण गराएका हुन। यस्तै जेष्ठ नागरिक एकल महिला ३०९ जना , जेष्ठ नागरिक दलित २८८ जना, विधवा महिला ५९५ जना, जेष्ठ नागरिक अन्य १९२७ जनाले घुम्ती शिविर मार्फत नवीकरण गराएका छन् ।
त्यस्तै वडागत रुपमा वडाका बिभिन्न टोलहरुमा संचालन गरिएको शिविरबाट वडा नं १ मा ६४४ जना, वडा नं. २ मा ५८९ जना, वडा नं. ३ मा ८३१ जना, वडा नं. ४ मा ९२३ जना र वडा नं. ५ मा ५६० जनाले लाभग्राही परिचय पत्र नवीकरण गरेका हुन।
सरकारले लाभग्राही परिचय पत्र नविकरणका लागि यस आर्थिक बर्षबाट राष्ट्रिय परिचय पत्र र बायोमेट्रिक प्रणाली अनिवार्य गरेपछि २९३ जनाको राष्ट्रिय परिचयपत्र नभए पछि लाभग्राहीले स्वघोषणा गरी नवीकरण गरिएको वडा नं. १ का वडा सचिव मधुकला घर्तिले जानकारी दिए ।
सरकारले ९० बर्ष माथी र दलित बालबालिकालाई राष्ट्रिय परिचयपत्र नभए पनि नवीकरण गर्ने गरि सर्कुलर गरेको थियो । शिविरमा छुटेका लाभग्राहीले भाद्र मसान्त भित्र वडा कार्यालयमा गई आफ्ने सामाजिक सुरक्षा परिचयपत्र नवीकरण गर्न सक्ने सामाजिक सुरक्षा तथा पञ्जीकरण सेवा इकाई प्रमुख पोख्रेलले बताए ।
