बासुदेव ढकाल / रामपुर (पाल्पा) । पाल्पा रामपुरको इलाका प्रशासन कार्यालयले आफ्नै भवनबाट सेवा दिन थालेको छ । रामपुर नगरपालिका-५ बेझाँडमा निर्माण भएको सुविधा सम्पन्न भवनबाट कार्यालयले सेवा दिन थालेको हो ।
जिल्ला सरदर मुकाम तानसेन देखी ६५ कि.मि. पुर्व रामपुर क्षेत्रमा २०७३ सालमा स्थापना भएको कार्यालयले स्थापना देखि नै रामपुर ५ बेझाँड स्थित भाडाको घर बाट सेवा दिदै आएको थियो ।
कार्यालयको आफ्नै भवन नहुँदा सेवा प्रवाह समस्या हुँदै आएको थियो । आधुनिक प्रविधिबाट निर्माण भएको अपाङ्गमैत्री कार्यालय भवनसंगै गार्ड हाउस, क्यान्टिन तथा कम्पाउण्ड निर्माण भएको छ ।
कार्यालय प्रमुख कार्कीले कोठा अभावका कारण दैनिक सेवा प्रवाहमा असहज हुँदै आएकोमा भवन निर्माण पश्चात थप सेवा सुचारु गर्न सहज हुने बताए ।
डिपिआर, माटो परिक्षण, भवन निर्माण र कर्मचारी भर्ना गरी कुल चार करोड ५६ लाख ७७ हजार ५७१ को लागतमा १४ कोठा सहितको साढे २ तल्ले भवन भवन निर्माण कार्य सम्पन्न भएपछि गत साउन ७ देखि सेवा दिन सुरु गरिएको कार्यालय प्रमुख गणेश बहादुर कार्कीले जानकारी दिए ।
उनले भने,“कोठा अभावका कारण सेवा प्रवाहमा असहज भएको थियो । प्रशासनबाट हुँदै आएका कार्य संगै थप सेवा प्रदान गर्नका लागि समेत सहज हुने भएको छ ।”
हाल सम्म कार्यालय बाट नागरिकता प्रदान संगै संगै नाबालक परिचय पत्र, दलित, जनजाति प्रमाणित लगायतका सेवा प्रवाह हुँदै आएको छ । भवन निर्माण संगै इलाका प्रशासन बाटै राष्ट्रिय परिचय पत्र र राहदानी सेवा प्रदानको लागि प्रयास भैरहेको उनले जानकारी दिए । पछिल्लो समय औसतमा दैनिक ६० नागरिकता जारी हुने गरेको कार्यालयले जनाएको छ । कार्यालयले जिल्लाको ३ पालिका भित्रका १७ वडाका जनतालाई सेवा प्रदान गर्दै आएको छ ।
इलाका प्रशासन कार्यालय रामपुरले पाल्पा जिल्लाको ३ पालिका भित्रका १७ वडाका जनतालाई सेवा प्रदान गर्दै आएको छ । जसमा रामपुर नगरपालिकाको १० वटै वडा, पूर्वखोला गाउँपालिका वडा नं. १ र निस्दी गाउँपालिकाको वडा नं. १ देखि ६ सम्म रहेको छन।
