बासुदेव ढकाल / रामपुर(पाल्पा) । पाल्पाको रामपुर नगरपालिका वडा नं.२, पाल्पाले वडा भित्रका सुत्केरी महिलालाई लोकल कुखुराको भाले र घ्यू उपहार दिन सुरु गरेको छ ।
वडा भित्रको स्वास्थ्य संस्थामा सुरक्षित प्रसुति सेवा लिएका सुत्केरी आमालाई ‘गर्भवती, सुत्केरी तथा बालबालिका पोषण कार्यक्रम’ मार्फत चालु आर्थिक वर्ष देखि सुत्केरी भएका महिलालाई पोषणको लागि एक वटा कुखुराको भाले र एक केजी घ्यू दिन सुरु गरेको हो ।
गत आर्थिक बर्षमा अण्डा उपहार कार्यक्रम संचालन गरेको वडाले सुरक्षित सुत्केरी कार्यक्रमलाई महत्व दिदै चालु आर्थिक वर्ष देखि वडाले सुत्केरी आमा र शिशुको पोषणलाई मध्यनजर गर्दै वडा कार्यालयले घर मै पुगेर भाले र घ्यू उपहार दिन सुरु गरेको वडा कार्यालयले जनाएको छ ।
वडाका जनप्रतिनिधि, कर्मचारी स्वास्थ्यकर्मीको उपस्थितिमा वडाध्यक्ष कृष्ण बहादुर दर्जीले आधारभूत स्वास्थ्य केन्द्र भलायटारमा सुरक्षित सुत्केरी गराएका भलायटारका सुत्करी नेत्र कुमारी थापा र खयरबोटका सीता नेपालीलाई प्रतिब्यक्ति १ लोकल भाले र १ माना घ्यु उपहार प्रदान गरी कार्यक्रमको शुभारम्भ गरेको हो ।
सुत्करीलाई उपहार प्रदान गर्दै वडाध्यक्ष दर्जीले जनजाती र दलित समूदायको बसोबास रहेको वडामा सुरक्षित सुत्केरी गराई आमा र बच्चाको सुरक्षाको लागि जनचेतना वढाई कार्यक्रमलाई प्रभावकारी बनाउन सुत्केरी उपहार कार्यकंम ल्याईएको बताए ।
आधारभूत श्वास्थ्य केन्द्र भलायटार र शहरी श्वास्थ्य केन्द्र खयरबोटमा सुरिक्षत सुत्केरी प्रोत्साहन सुत्केरी महिला लोकल कुखुराको भाले र घ्यू उपहार कार्यक्रमका लागि यस आ.व.मा १ लाख बजेट विनियोजन गरेको वडा सचिव तारानाथ पोख्रेलले जानकारी दिएका छन ।
