बुटवल ।गर्भाधानअघि पुरुषले जाँड–रक्सी खाएमा शिशुमा नकारात्मक असर पर्ने अध्ययनबाट देखिएको छ । यसअघि गर्भवती महिलाले जाँड–रक्सी खाएमा शिशुमा पर्ने असरबारे चर्चा हुने गरेकोमा वैज्ञानिकहरूले गरेको अध्ययनले गर्भाधानअघि पुरुषले जाँड–रक्सी खाएमा पनि शिशुमा नकारात्मक असर पर्ने देखाएको हो ।
वैज्ञानिकहरूले गर्भाधान गर्नुभन्दा तीन महिना अघिदेखि दैनिक ५० एमएल रक्सी पिउने र कति पनि रक्सी नपिउने पुरुषका सन्तानबीच तुलना गरेका हुन् । ती शिशुका आमाहरूले भने कति पनि रक्सी पिउँदैन थिए । वैज्ञानिकहरूको अध्ययनमा रक्सी पिउने पिताका सन्तानमा तालु चिरिने, जन्मजात मुटु र पाचनसम्बन्धी समस्या बढी देखिएको छ ।
त्यस्तै रक्सी पिउने पिताका सन्तानमा व्यवहारजन्य, संज्ञानात्मक, सिकाइसम्बन्धी र ढिलो बोल्नेजस्तो समस्या पनि देखिएको अध्ययनमा संलग्न वैज्ञानिकहरूलाई उद्धृत गर्दै बीबीसीले जनाएको छ ।
वैज्ञानिकहरूले सन् २०२१ मा चीनमा पाँच लाख जोडीका सन्तानको अध्ययन गरेका थिए । जसमा रक्सी नपिउने पुरुषको तुलनामा पिउने पुरुषका सन्तानमा देखिएका समस्या साढे एक प्रतिशतले बढी थियो ।
यस्तै मानिसमा रक्सी पिएको वा नपिएको यकिन गर्न कठिन भए पनि यही वर्ष वैज्ञानिकहरूले मुसामा परीक्षण गरेका थिए । जसमा रक्सी खाएका भालेका सन्तानको अनुहारको रूपरेखा बिग्रनेदेखि हिँडडुल गर्न नमान्ने, धेरै लड्ने, सिक्न समय लगाउने जस्ता समस्या बढी देखिएको प्रतिवेदनमा उल्लेख छ ।
