बुटवल । बुटवलको मिलनचोक डेल्टा मार्टस्थित नेपाली जुत्ता घर पुनः संचालनमा आएको छ । असार ६ गते आगलागी भएपछि जुत्ता घर सहित सबै पसलहरु बन्द थिए ।
अहिले दुई महिनाको डेढलाख भाडा तिर्ने र जुत्ता विक्रिको १५ प्रतिशत नाफा लिनेगरी ठेक्काको शैलीमा टेन्ट टांगेर पसल सञ्चालन गरिएको हो । टेन्ट भित्र विभिन्न ८ वटा कम्पनीका जुत्ता छुट अफर सहित विक्रि गरिने मेलाका सञ्चालक प्रकाश भुसालले बताए ।
यसअघि जुत्ता मेलाको नाममा ब्यापार गर्न खोजिएकोमा बुटवलका चार वटा व्यवसायिक संस्थाले मेलाको परिभाषा र उद्देश्य विपरित भएको भन्दै आपत्ति जनाउंदै मेला रोक्न भनेका थिए । आम व्यवसायीको विरोधपछि सोमबार भएको छलफलमा मेला नगर्ने सहमति भई जुत्ता घर पसल पुनः सञ्चालन भएको हो । जुत्ता घरको लुम्बिनी प्रदेशका पूर्वमन्त्री विष्णु पन्थीले आईतबार उद्घाटन गरे ।
यसैबीच जुत्ता उत्पादक संघका अध्यक्ष रुद्र न्यौपानेले नेपालमा १० करोड जोर जुत्ता चप्पलको माग भएपनि नेपालका उद्योगले १६ करोड जोडी जुत्ता चप्पल उत्पादन गर्न सक्ने पुर्वाधार भएको बताए । उनले करीब ४ करोड जोडी जुत्ताचप्पल बाहिरबाट भित्रिने गरेको बताए । साढे दुई करोड जोडी जुत्ता चप्पल राजश्व छली गरेर भित्रिने गरेको न्यौपानेले बताए ।
कार्यक्रममा फुटवेयर म्यानुफ्याक्चरर एशोसियसन अफ नेपालका केन्द्रिय उपाध्यक्ष सुरज बन्जाडेले नेपाली उपभोक्ताहरुको मागको ६५ प्रतिशत हिस्सा नेपाली उत्पादनवाट भइरहेको बताए ।
बुटवल उद्योग बाणिज्य संघका अध्यक्ष हरिप्रसाद अर्यालले एकजना व्यक्तिले मेलाको नाममा भ्रम छरेर उपभोक्तालाई झुक्याउन खोजेको देखिएपछि व्यवसायिक संस्थाहरु एक ठाउंमा उभिएर प्रतिवाद गरेको बताए । ‘पसल चलाउन पाइन्छ, सित्तैमा सामान दिए पनि आपत्ति भएन, तर एकजना व्यक्तिले २–४ वटा पसललाई मेलाको नाम दिएर उपभोक्ता झुक्याउन र भ्रम छर्न पाइदैन,त्यसैले मेला नभई पसल पुनः सञ्चालन गर्ने सहमति भएको हो’–अध्यक्ष अर्यालले स्पष्ट पारे ।
