बुटवल । मासु व्यवसायी संघ रुपन्देहीले आफ्ना सदस्यहरुको पसलमा पुगेर सरसफाई तथा गुणस्तर सचेतना अभियान शुरु गरेको छ । संघका अध्यक्ष विशाल थापासहित पदाधिकारी र सदस्य सहितको टोलीले शुक्रबार गोलपार्क क्षेत्रबाट सचेतना अभियान शुरु गरेको हो ।
पहिलो दिन करिब ४० वटा मासु पसलमा अवलोकन गरी पसलको नियमित सरसफाई गर्न तथा ताजा, स्वच्छ र गुणस्तरीय मासु विक्रि गर्न स्मरण गराएको संघका अध्यक्ष थापाले बताए । व्यवसायीले उपभोक्ताको स्वास्थ्यलाई पहिलो प्राथमिकतामा राखेर गुणस्तरीय मासु बेच्ने काममा तलमाथि नगरुन् भनेर संघले यो अभियान चलाएको र यसलाई नियमित सञ्चालन गर्ने उनले बताए ।
साथै संघले ब्रोइलर कुखुराको मासु प्रति केजी २० रुपैयां घटेकाले नयां मूल्य ३ सय ८० रुपैयां कायम भएको मूल्यसूचि समेत व्यवसायीलाई वितरण गरिएको उनले जानकारी दिए ।
खुला सीमाबाट कुखुराको तस्करी भएका कारण मूल्यमा अस्वस्थ प्रतिस्पर्धा भएकाले स्वदेशी ब्रोइलर कुखुरा खरिद गर्ने मासु व्यवसायीहरु मर्कामा परेको गुनासो आएकाले सरकारले अवैध आयात रोक्नुपर्ने अध्यक्ष थापाले बताए ।
