भैरहवा । सशस्त्र प्रहरीले रुपन्देहीको मर्चवार क्षेत्रबाट ठुलो मात्रामा भन्सार छलीको अवैध सामान वरामद गरेको छ ।
कोटहीमाई गाउंपालिका ६ वोगडीबाट महेश यादवको घरमा राखिएको गोदानबाट १२ लाख बढीको लत्ताकपडा र हुक्कामा प्रयोग गरिने कोईला नियन्त्रणमा लिईएको रुपन्देहीका सशस्त्र प्रहरी प्रमुख सशस्त्र प्रहरी उपरिक्षक आनन्द थापाले जानकारी दिए । उनका अनुसार उक्त सामान भन्सार पठाईएको छ ।
तस्करहरुले अत्यधिक प्रयोग गर्ने गरेको बोगडी क्षेत्रमा तस्करीको सामान गोदाम गरेको सुचना सशस्त्र प्रहरी वल नेपाल ईन्टेलिजेन्ट ब्युरोलाई प्राप्त भएको थियो । सोही सुचनाको आधारमा विओपी मजगांवाबाट सशस्त्र प्रहरी निरीक्षक विजय कुवंरको कमाण्डमा खटिएको गाडि मोवाईल टोलीले महेश यादवको घरबाट सामान वरामद गरेको थियो ।
वरामद गरिएको पोकामा महिलाहरुले प्रयोग गर्ने सुट, टप्स, पुरुषका सुट, गम्छा तथा कोईला रहेको सशस्त्र प्रहरी उपरिक्षक थापाले जानकारी दिए । ्उनका अनुसार १३ सय पिस टप्स सुट, ४ सय ६२ थान जेन्स टिसर्ट, १ हजार २४ थान गम्छा, १ सय ७३ थान सेन्डो, २ सय १६ थान लेडिज सुट, २ सय ८० जोर चप्पल, ३० थान लेडिज पाईन्ट, २४ पोका काईला रहेको पाईएको छ ।
वरामद सामानको भन्सार मुल्य १२ लाख बढी रहेको र उक्त सामान भन्सार चलान गरिएको छ । पछिल्लो समय तस्करहरुबीच एकआपसमा मनमुटाव हुंदा एक समुहले अर्को समुहका विषयमा सुराकी दिने र सामान पक्राउने क्रम बढेको छ ।
रुपन्देही जिल्लाका विभिन्न नाकामा नेपाल प्रहरी, सशस्त्र प्रहरीका युनिटहरु रहेपनि स्थानीय तस्करसंग मिलेमतो गरेको आरोप लगाउंदै असन्तुष्ट समुहले सिधै ब्युरोमा जानकारी गराउंने गरेका छन् । उक्त सामान तस्कर तौलन भनिने राधेश्याम जयसवालको रहेको बुझिएको छ । उनी रुपन्देहीका नाम कहलिएका कपडा तस्कर हुन् ।
