बुटवल । देशभर हिजोदेखि निरन्तर पानी परिरहेको छ । कर्णाली र सुदूरपश्चिमा हल्कादेखि मध्यम र अरू सबै ठाउँमा घनघोर वर्षा भएको छ । मौसमविदले पूर्वानुमान गरेअनुसार नै धेरै ठाउँमा घनघोर पानी पर्दा जनजीवन प्रभावित भएको छ ।
हिजो दिउँसोसम्म पूर्वी क्षेत्रमा घनघोर वर्षा भएकोमा हिजो बेलुकीदेखि मध्य क्षेत्रमा घनघोर वर्षा भइरहेको छ भने भरे रातिदेखि पश्चिम क्षेत्रमा पनि घनघोर वर्षाको सम्भावना रहेको मौसम पूर्वानमान महाशाखाले जनाएको छ । घनघोर र लगातार वर्षाका कारण सबैजसो नदी खोलामा बाढी आएको छ ।
सडकका ठाउ–ँठाउँमा पहिरो खसेको छ भने काठमाण्डौ उपत्यका लगायतका शहरी क्षेत्रका सडक पोखरीजस्ता भएका छन् । लगातार परेको पानीले हिँडडुल गर्न पनि समस्या भएको छ । आज दिनभर यसैगरी पानी पर्ने र भोलि बिहानदेखि मौसम क्रमिक सुधार हुने मौसमविद् शान्ति कँडेलले जानकारी दिए ।
