बुटवल । दैनिक लुम्विनी र राष्ट्रिय स्वाधीनताका लागि नागरिक मन्च रुपन्देहीको आयोजनामा दैनिक लुम्बिनीका संस्थापक सम्पादक कर्ण बहादुर कार्कीको निधनको नवौं दिनको पुण्य तिथीमा  श्रद्धाञ्जली सभा  भएको छ ।

बुटवलमा भएको श्रद्धाञ्जली सभामा बोल्ने वक्ताहरुले स्वर्गीय कार्कीले लोकतन्त्र र आवाजविहीन नागरिकको पक्षमा पत्रकारिता र आन्दोलनमार्फत गरेको योगदान सधैं अविस्मरणीय रहने बताए । राष्ट्रिय जनमोर्चाका अध्यक्ष चित्रबहादुर केसीले स्वर्गीय कार्कीले पञ्चायती व्यवस्था र राजतन्त्र विरुद्ध पत्रकारितामार्फत महत्वपूर्ण योगदान गरेको स्मरण गरे ।

कार्की लोकतन्त्र र आम नागरिकविरुद्ध हुने अन्याय अत्याचारविरुद्ध लड्ने प्रतिबद्ध व्यक्ति भएको कार्कीले बताए । नेता केसीले  जीवनकालमा गरेका राम्रा कामको मूल्यांकन मृत्यु पछि पनि हुने भन्दै कार्कीका असल कामबाट सबैले सिक्नुपर्ने बताए ।

राजनीति गर्ने नेता, मिडिया र नागरिकको इमान्दार  भूमिकाले मात्रै समाज बदलिने उल्लेख गर्दै नेता केसीले अहिलेको राजनीति कमाउने र धनी हुने व्यापार जस्तो भएको र नेताहरुको यस्तै प्रवृत्तिले लोकतन्त्रका पक्षपाती हौ भन्ने नेताबाटै लोकतन्त्र खतरामा रहेको बताए ।

शक्ति राष्ट्रहरुको स्वार्थ र एजेण्डामा ठूला दलहरू चल्दा सरकार फेरबदल भइरहेको उनले बताए । राष्ट्रियता कमजोर बनेको र देश रहने हो कि होइन भन्ने संकटग्रस्त अवस्थामा पुगेको उनले बताए । 

सो अवसरमा दैनिक लुम्बिनीका अध्यक्ष मोहन चापागाईले स्वर्गीय कार्कीले पत्रकारिताको संस्थागत विकास र विभिन्न आन्दोलनमार्फत समाजमा पुराएको योगदानलाई पत्रिका परिवारले सधैं सम्झिरहने  बताए ।

कार्यक्रममा नेपाल कम्युनिष्ट पार्टीका केन्द्रीय सदस्य वसन्त श्रेष्ठ, क्रान्तिकारी कम्युनिस्ट कृष्णराज पौडेल, लेखक तथा वामपन्थी नेता विनबाहादुर कुँवर, लेखक ऋषि आजाद,अधिवक्ता ज्ञानु केसी , पदम कार्की  लगायतले स्वर्गीय कार्की स्वाभिमानी,निर्भिक र क्रान्तिकारी विचारको धनी अनि  आवाजविहिनको आवाज रहेको चर्चा गरे । कार्की विकृति विसंगति विरुद्ध आवाज उठाउने व्यक्ति भएकाले उनको योगदान बिर्सन नसकिने बताए ।  

लुम्बिनी दैनिकका संस्थापक सम्पादक कार्कीको निधन भावपूर्ण अन्तिम श्रद्धाञ्जली कार्कीजी