भैरहवा । सोमबार विहान सशस्त्र प्रहरी बल नेपाल र भैरहवा भन्सार कार्यालयको संयुक्त टोलीले भारतबाट अवैध रुपमा भित्रिएको ४ सय ७१ बोरा चिनी भैरहवाबाट बरामद गरेको छ । विशेष सूचनाको आधारमा सिद्धार्थनगर नगरपालिकाका–४ स्थित सुगरमिल क्षेत्रमा संचित गरि राखिरहेको अवस्थामा उक्त चिनी सँगै रहेका २ वटा गोदामबाट नियन्त्रणमा लिएको हो । सशस्त्र प्रहरी बल, नेपाल प्रस्तावित सीमा सुरक्षा गुल्म डण्डा,रुपन्देहीका प्रमुख डीएसपी चन्द्रकुमार थापाको नेतृत्वमा गएको टोलीले अवैध चिनी नियन्त्रणमा लिई आवश्यक कारवाहीका लागि भन्सार बुझाएको छ ।
यस्तै सशस्त्र प्रहरी बल, नेपाल सुरक्षा बेश अमुवा रुपन्देहीबाट खटिएको मोवाईल गस्ती टोलिले चेकजाँच गर्ने क्रममा असोज १३ गते शुद्धोधन गाउँपालिका वडा नं. ३ बेतहानी क्षेत्रबाट लु १ च ६३२४ न फोर्स पिकअप सहित ३२ लाख ३३ हजार मुल्य बराबरको अवैध सामान नियन्त्रणमा लिएको छ । कपडा, जुत्ता, मोबाइलका पार्टस लगायतका अवैध बस्तुहरु भित्रिएको भनि विशेष सूचनाकै आधारमा सो सामान बरामद भएको हो ।
यस्तै असोज १ गते सशस्त्र प्रहरी बल नेपाल नं. २७ गण हे.क्वा. रुपन्देहीबाट र स.प्र.बल, नेपाल सुरक्षा बेश अमुवाबाट खटिएको संयुक्त टोलीले चेकजाँच गर्ने क्रममा सियारी छपियाबाट सिमेन्ट बोकेको ट्रकमा भारतबाट भन्सार छली अवैध रुपमा भित्रिएका ५३ लाख बराबरको कपडा बरामद गरेको छ । ना ६ ७६०५ नं. को ट्रकमा सिमेन्ट सहित लेडिज कुर्ता सलवार, कुर्ती, जुत्ता चप्पल रहेको थियो ।
यि त केही उदाहरण मात्रै हुन सशस्त्र प्रहरी बल नेपाल नं. २७ गण हे.क्वा.रुपन्देहीले पछिल्लो समय सक्रियता बढाएको छ ।
सशस्त्र प्रहरी उपरिक्षक आनन्द थापाले कमाण्ड सम्हाले यताको अवधिमा ९ करोड ७० लाख बढिको अवैध सामान नियन्त्रणमा लिई भन्सार तथा सम्बन्धित निकायमा पठाइएको छ । रुपन्देही जिल्ला अन्तर्गत ७० किलोमिटर अन्तराष्ट्रिय सीमानाको रक्षा, सीमा स्तम्भहरुको सुरक्षा, सीमावर्ती क्षेत्रका बासिन्दाहरुको शान्ति सुरक्षा लगायतको कामसँगै खुला सिमाका कारण हुन सक्ने चोरी तस्करीलाई न्यूनिकरण गर्नमा प्रयासरत रहेको छ ।
सिमित जनशक्ति र स्रोतसाधनको प्रयोग गर्दै गणले ९ महिनाको अवधिमा ३ करोड ७४ लाख ५२ हजार मुल्य बराबरको कपडा, जुत्ता र खाद्यन्न लगायतको बस्तु नियन्त्रणमा लिएको छ । यस्तै ३ करोड ७७ लाख बराबरको अवैध मालवस्तु ढुवानीमा प्रयोग भएका सवारीसाधन, ५३ लाख ८५ हजार मुल्य बराबरको प्याज, ७० लाख बढिको चिनी, ६ लाख बराबरको चिनी र ४८ लाख बराबरको ब्रोइलर कुखुरा नियन्त्रणमा लिई आवश्यक कारवाहीका लागि पठाइएको सशस्त्र प्रहरी बल नेपाल नं. २७ गण हे.क्वा.रुपन्देहीका सूचना अधिकारी सशस्त्र प्रहरी नायब उपरिक्षक दुर्गा थापाले बताए ।
यस्तै तस्करी तथा अवैध ओसापसारमा संलग्न चालक तथा व्यक्तिहरुलाई सम्झाई बुझाई गर्ने र संलग्न रहेको पाइएमा भन्सार कार्यालय र राजश्व कार्यालयमा बुझाउने गरेको छ । ९ महिनाको अवधिमा गणले २ जनालाई नियन्त्रणमा लिई भैरहवा भन्सार कार्यालय र १ जनालाई जिल्ला प्रहरी कार्यालय कारवाहीका लागि पठाएको छ । अवैध कुखुरा तथा माछा बरामद गरी पशु क्वारेन्टाईनको रोहवरमा नष्ट गरिएको गणले जानकारी दिएको छ ।
भारतसँग खुला सीमा जोडिएको जिल्ला भएका कारण यहाँ अवैध क्रियाकलाप, लागुऔषध एवं हातहतियारको अवैध ओसारपसार, चोरी–तस्करी, मानव बेचबिखन लगायतका घटना हुने गरेका छन । यस्ता घटना नियन्त्रणका लागि सशस्त्र प्रहरीले सीमावर्ती क्षेत्रमा निगरानी बढाएको छ भने आपत विपदमा पनि सशस्त्र प्रहरीको भुमिका उत्कृष्ट छ, विपदमा खोज तथा उद्धार र विपद् जोखिम न्यूनीकरणलाई उच्च प्राथमिकतामा राखेर कार्यसम्पादन गर्दै आएको छ । सशस्त्रको निगरानीका कारण सीमा क्षेत्रका नागरिकले शान्ति सुरक्षाको दरिलो अनुभूति गर्ने गरेका छन ।
गणको नेतृत्व सम्हालेदेखि नै एसपी थापाले तस्करी नियन्त्रणमा कठोर छन । फागुनमा कमाण्ड सम्हालेको एसपी थापाले पहिलो महिनामै झण्डै एक करोड मुल्य बराबरको अवैध सामान नियन्त्रणमा लिएका थिए । त्यसपछि पनि निरन्तर रुपमा हरेक महिना एक करोडकै हाराहारी अवैध सामानहरु नियन्त्रणमा लिएका छन । भारतबाट नेपालतर्फ चोरी पैठारी गर्न लागिएको कपडा, चिनी, प्याज, कपडा, खाद्यन्न, हार्डवेयर, मोटर पार्टस, उपभोग्य सामान तथा ओसारपसारमा प्रयोग भएका साधन समेत नियन्त्रणमा आउने गरेको तथ्याङक छ । उनले सिमामा निगरानी बढाउदै सिमाबाट हुने अवैध कारोबारको सम्भावित क्षेत्रको पहीचान गरी योजनाबद्ध रुपले प्रस्तुत हुदा अवैध बस्तुको नियन्त्रणको बढ्नुका साथै तस्कर तथा भरियाहरु पनि पछि हटेका छन । खुला सीमा नाकाको फाइदा उठाएर हुने गरेको अवैध भन्सार चोरी पैठारीमा कडाई गर्न कुनै कसर बाँकी नराखेको उनको भनाई छ ।
सशस्त्र प्रहरी बल नेपाल २७ नम्बर हेड क्वाटर अन्तर्गत बोर्डर आउट पोष्ट (विओपि) सहित १७ वटा शसस्त्र प्रहरीकै युनिटहरु रहेको छ ।
सिमामा सशस्त्रको ‘स्क्वायड डग’ बाट निगरानी
पर्वलाई लक्षित गर्दै रुपन्देहीमा ‘स्क्वायड डग’ बाट सिमा तथा शंकास्पद क्षेत्रमा निगरानी गरिदै छ । खुल्ला सीमा नाकाको फाइदा उठाउँदै हुन सक्ने सीमा अपराधलाई प्रभावकारी ढंगले नियन्त्रण गर्न सशस्त्र प्रहरी बल नेपालले रुपन्देहीमा ५ जना को टोली सहित २ वटा कुकुर परिचालन गरेको छ ।
सशस्त्र प्रहरी बल नेपाल, प्रधान कार्यालय काठमाडौंबाट आएका स्क्वायड डग टिमले लागूऔषध, विस्फोटक पदार्थ तथा हातहतियारको निगारनी गर्ने छ । सीमा क्षेत्रमा ती कुकुरहरुलाई परिचालन गर्नका लागि सशस्त्र प्रहरी वरिष्ठ हवलदार नविन श्रेष्ठको नेतृत्वको (के–नाइन) टोली रुपन्देही छन । सीमावर्ती क्षेत्रमा हुन सक्ने अवैध लागूऔषध, विस्फोटक पदार्थ तथा हातहतियार ओसार पसार नियन्त्रण गर्नका लागि उनीसहित ५ जना तालिम प्राप्त टीम रुपन्देहीमा खटिएका छन ।
डेजी र साया नाम गरेका कुकुरले विष्फोटक पदार्थ, लागूऔषध तथा हातहतियार भएको थाहा पाएपछि जानकारी दिने गर्छ । साया ल्याब्रोडर प्रजातिको कुकुर हो यो लागुऔषधको पहिचान गर्छ भने डेजी जर्मन सेफर्ड प्रजातिको हो यसले हातहतियार र विष्फोटक पदार्थको पहिचान गर्ने सशस्त्र प्रहरी बल नेपाल नं. २७ गण, हेडक्वाटर भैरहवाका प्रमुख सशस्त्र प्रहरी उपरीक्षक (एसपी) आनन्द थापाले भने
थापाले अहिलेको लागि अनियमित रुपमा सिमा क्षेत्र र भिआइपी मुभमेन्ट यसलाई प्रयोग गरेका छौ । कुकुरले यहाँको वातावरणलाई सहज रुपमा लिए जिल्लाको सुरक्षा संवेदनशीलतालाई मध्यनजर गर्दै यो यसलाई निरन्तरता दिई सीमा अपराध नियन्त्रणमा प्रभावकारी ढंगले काम गर्ने बताए । अहिलेको लागि विशेष आर्थिक क्षेत्रमा रहेको बेसमा यसलाई राखिने र आवश्यकता अनुसार बेलहिया नाका, ककरहवा नाका, भगवानपुर नाका लागयतका क्षेत्रमा चेकजाँचमा प्रयोग गरिने बताए ।
