बुटवल । पश्चिमाञ्चल पेट्रोलियम डिलर्स एशोसिएसनले बुटवलमा रहेका लुम्बिनी केवल कार लिमिटेड र आधुनिक समाज डेण्टल केयर प्रा.लि. संग टिकट तथा उपचार सेवामा छुट सुविधा सम्वन्धि सम्झौता गरेको छ ।
लुम्बिनी केवल कार र एशोसिएसन विच एशोसिएसनका पदाधिकारी, कार्यसमिति सदस्य र कर्मचारीहरुलाई संस्थाको परिचय पत्रका आधारमा साधारण टिकटमा केवल कारले २० प्रतिसत छुट सुविधा उपलब्ध गराउने सम्झौता भएको छ । यस्तै दुबै संस्थाले होर्डिङ्ग बोर्ड तथा विज्ञापन मार्फत एक अर्काको ब्यवसायिक प्रवद्र्धन गर्ने सम्झौतामा उल्लेख छ ।
२०८१ साल मंसिर ५ गते देखि २ बर्षका लागि गरिएको सम्झौता पत्रमा एशोसिएसनका तर्फबाट अध्यक्ष हिमाल गैरे र लुम्बिनी केवल कारको तर्फबाट अपरेशन म्यानेजर डिल्लीनारायण कायस्थले हस्ताक्षर गरेका छन् ।
यस्तै एशोसिएसन र बुटवल ६ मा रहेको आधुनिक समाज डेण्टल केयर प्रा.लि. विच मुख स्वास्थ्य अन्तर्गत दाँत, मुख र गिजा सम्वन्धि उपचारका लागि समाज डेण्टलले पेट्रोल तथा डिलर संस्थाका पदाधिकारी, सदस्य ब्यवसायी, कर्मचारी तथा ब्यवसायीका एकाघरका परिवारका सदस्यको आधारभूत उपचारमा ३० प्रतिसत छुट उपलब्ध गराउने सम्झौता गरिएको छ ।
यसका लागि उपचार गराउने ब्यक्ति संग संस्थामा रहेको परिचय खुल्ने कुनै पनि प्रमाण–पत्र वा परिचय पत्रलाई अनिवार्य गरिएको छ ।
यसैगरी दन्त उपचार अन्तर्गत कस्मेटिक उपचार गर्नुपरेमा समाज डेण्टलले १० प्रतिसत छुट सेवा उपलब्ध गराउने छ । एशोसिएसनले कुनै पनि कार्यक्रम आयोजना गर्दा दन्त परीक्षण गर्ने उद्देश्य राखेमा समाज डेण्टलले बर्षमा २ वटा कार्यक्रममा निशुल्क दन्त परीक्षण गर्ने सहमति भएको छ ।
हाल मुख क्यान्सर बढ्दै गएको अवस्थामा नागरिकहरुलाई सन्देश प्रवाहित गर्नुपर्ने दुबै संस्थाको सामाजिक उत्तरदायित्व रहेकाले ‘क्यान्सरबाट बचौं र बचाऔं’ भन्ने सन्देश सहितको स्टीकर समाज डेण्टलले निर्माण गरी हरेक पेट्रोल पम्पको उपयुक्त स्थानमा टांस्ने गरी भएको सम्झौता पत्रमा एशोसिएसनको तर्फबाट अध्यक्ष हिमाल गैरे र समाज डेण्टलका योजना प्रमुख माधव सापकोटाले हस्ताक्षर गरेका छन् ।
