श्रीराम ज्ञवाली
बुटवल
लुम्बिनी प्रदेश सरकारको मातहतको बुटवल तामनगरस्थित जनस्वास्थ्य प्रयोगशाला ओझेलमा परेको छ । बुटवलको तामनगरमा सरकारको लगानीमा बनेको भव्य भवन तथा संरचना रहेको प्रयोगशालाको लोकेसन र त्यहाँबाट उपलब्ध सेवा सुविधाबारे अधिकांश नागरिकलाई नै जानकारी नै छैन ।
संघीयता लागू भएपश्चात् सरकारले प्रदेशवासीलाई केही ल्याब परीक्षण निःशुल्क र केही परीक्षण न्यूनतम शुल्कमा गर्ने गरी प्रयोगशाला सञ्चालनमा ल्याएको हो । तर प्रयोगशालाबारे उचित प्रचार प्रसारको अभावमा नागरिकलाई जानकारी नभएको कारणले नागरिकहरु सेवा लिन गएका छैनन् । प्रयोगशालामा होलबोडि चेक अप, थाइराईड, मिर्गौला, रगत, कोरोना, दिसा–पिसाब, सिकलसेल (वंशाणुगत), पाठेघर क्यान्सर, एचआईभी, फ्लुएन्जा भाइरस, क्षयरोगलगायत करिव तीनसय थरि टेस्ट हुन्छ । होल बडी चेकजाँचका लागि न्यूनतम १ हजार ६ सय शुल्कमा परीक्षण गरिरहेको छ । अरु शुल्क पनि निजीभन्दा धेरै सस्तो छ ।
ग्लोबल फण्ड सेभ द चिल्ड्रेनले भवन बनाई केही उपकरणसहित प्रदेश सरकारलाई हस्तान्तरण गरेको थियो । यसमा स्थानीय, प्रदेश र संघको सहयोग रहेको छ । कोरोना भाइरस संक्रमणको समयमा पालिका र जिल्ला पुगेका मेसिनहरु कोरोनाकालपछि ती निकायले प्रयोगशालालाई उपलब्ध गराएका छन्् । २०८१ असार यता दैनिक २० जनाका दरले सेवाग्राहीले सेवा लिएका प्रयोगशालाका निमित्त निर्देशक राजेशकुमार गुप्ताले बताए । नागरिकलाई सस्तो शुल्कमा ल्याब परीक्षण सेवा दिने उद्देश्य अनुरुप स्थापना गरिएको प्रयोगशालाबारे नागरिकले जानकारी नपाएको कारण ओझेलमा परेको उनले दुखेसो पोखे ।
२०८० असोजमा आफू उक्त प्रयोगशालामा नियुक्त भएपश्चात् सुस्त रहेको कार्यालयलाई मूर्तरूप दिन सफल भएको र थप सक्रियतापूर्वक लाग्नुपर्ने देखेको उनले बताए । परीक्षण सेवाका साथै दर्ता नभएका प्रयोगशालालाई नियमसँगत दर्ता प्रक्रियामा ल्याउने काम पनि त्यहाँबाट हुने उनले बताए ।
प्रदेशभित्र फैलिएका विभिन्न समयका महामारीमा स्थलगत परीक्षण र उपचार, कोरोना भाइरसको अवस्था निरन्तर निगरानी र जानकारी लिनका लागि परीक्षण र सचेतनामा प्रयोगशालाले पहल गरेको बताए ।
सेवाग्राहीबाट आएको आम्दानी सरकारको राजस्व खातामा प्रत्यक्ष जाने गरेको छ । प्रयोशालामा २४ जना कर्मचारी कार्यरत छन् । अस्पताल र प्रयोगशालाको दूरी टाढा हुँदा झन्झट र उपचारमा ढिलाइ हुने भएकाले सेवाग्राहीहरु सरकारी प्रयोगशालामा नगई नजिकका निजी ल्याबमा महँगो शुल्क तिर्न बाध्य भएका एक कर्मचारीले बताए ।
