गुल्मी । गुल्मी जिल्लाको इस्मा गाउँपालिका ३ दर्लामचौरमा बृहत् स्वास्थ्य शिविर सम्पन्न भएको छ ।
इस्मा ३ वडा कार्यालयको आयोजना तथा चौराहा हस्पिटल प्रालिको प्राविधिक सहयोगमा भएको शिविरमा करिब ४ सय ५० जनाले सेवा लिएका छन् ।
दर्लामचौर हातेमालो सहयोगी समाज रुपन्देहीको समन्वयमा भएको कार्यक्रमको उद्धाटन गर्दै गाउँपालिका उपाध्यक्ष पार्वती कुँवरले पालिकाका जनतालाई सहज स्वास्थ्य चेकजाँच गर्नको लागि शिविरले महत्त्वपूर्ण भूमिका निर्वाह गरेको बताइन् ।
उनले इस्मा गाउँपालिकाले पालिका भित्रका महिला, जेष्ठनागरिक तथा सीमान्तकृत समुदायको हक हितलाई ध्यानमा राखेर कामहरू गरिरहेको बताउँदै स्वास्थ्यलाई विशेष प्राथमिकताका साथ अगाडी बढाएको बताइन् ।
कार्यक्रममा बोल्दै इस्मा गाउँपालिका वडा नम्बर ३ अध्यक्ष ज्योतिराज कुँवरले तालिम वडाका जनताले आफ्नो स्वास्थ्यको बारेमा जानकारी गराउने उद्देश्यसहित आयोजना गरिएको बताउँदै शिविर सञ्चालन गर्न सहयोग गर्नेलाई आभार व्यक्त गरे ।
शिविरमा फिजिसियन डा राजन भण्डारी, हाड जोर्नी तथा नशा रोग विशेषज्ञ डा. विवेक केसी, महिला तथा प्रसुतीरोग विशेषज्ञ दीपक पटेल, रेडियोलोजिष्ठ डा अमृतराज श्रेष्ठ, मेडिकल अधिकृतहरू किसान थापा र करण थापाले सहजीकरण गरेका थिए ।
दोहली स्वास्थ्य चौकीका प्रमुख रमेश मरासिनीको नेतृत्वमा ६ जनाको ल्याबको टोलीले शिविरमा सेवा दिएका थिए । दर्लामचौर स्वास्थ्य चौकीले पनि शिविरमा सहयोग गरेको कार्यक्रम संयोजनको भूमिकामा रहेका सुनिल नेपालीले जानकारी दिए ।
