बुटवल । निजामती कर्मचारीहरूको आधिकारिक ट्रेड युनियन जिल्ला कार्यसमिति रुपन्देहीले शासन सञ्चालनमा र प्रशासन बिचको अन्तरसम्बन्ध तथा सीमाहरू विषयक कार्यशाला सम्पन्न भएको छ । कार्यक्रममा रुपन्देही क्षेत्र नम्बर ५ का प्रतिनिधि सभा सदस्य सांसद , राज्यव्यवस्था तथा सुशासन समितिका सदस्य वासुदेव घिमिरेको प्रमुख आतिथ्यता रहेको थियो ।
आधिकारिक ट्रेड युनियन जिल्ला कार्यसमितिका अध्यक्ष रमेश पाण्डेको अध्यक्षतामा कार्यशाला सुरु भएको थियो । अध्यक्ष पाण्डेले स्थानीय तहका जनप्रतिनिधि र प्रशासनिक कर्मचारीबिचको अन्तर घुलन र स्थानीय सरकार सञ्चालनका निमित्त कार्यपत्र प्रस्तुत गर्ने कार्यक्रमको मुख्य उद्देश्य रहेको बताए ।
आधिकारिक ट्रेड युनियन रुपन्देहीका उपाध्यक्ष तथा कार्यशालाका संयोजक भोजराज न्यौपानेले स्वागत मन्तव्य राख्दै रुपन्देही जिल्लाका १६ वटै पालिकामा कर्मचारी र राजनीतिक दलका प्रतिनिधि बिच भौतिक रूपमा उपस्थित भएर तालमेल गरी विभिन्न समस्यालाई अन्त्य गरेको बताए ।
कार्यक्रममा राष्ट्रिय कर्मचारी संगठनका अध्यक्ष उत्सव न्याैपाने , नेपाल निजामती कर्मचारी युनियनका जिल्ला अध्यक्ष चक्रपाणी पाण्डे , नेपाल निजामती कर्मचारी संगठनका अध्यक्ष प्रेम प्रसाद खनाल लगायतले स्वागत मन्तव्य राखेका थिए ।
कार्यक्रमका प्रमुख अतिथि सांसद घिमिरेले पछिल्लो समय कर्मचारी र राजनीतिज्ञ बिच सुमधुर सम्बन्ध स्थापित गर्न राज्य लागिपरेको बताए । उनले सुशासन स्थापित गर्न कर्मचारीले राजनीतिज्ञलाई सहयोग र राजनीतिज्ञले कर्मचारीले कोरेका खाका अनुरूप विकासमा अगाडि बढ्न मद्दत पुगेको बताए । पछिल्लो समय देशमा नयाँ शक्तिको पलायन हुँदा नयाँ शक्तिले प्रशासनिक क्षेत्रमा ध्यान नदिएको कारण सरकारले छुट्टै खाका कोरी दक्ष जनशक्ति रोक्ने प्रयास गरेको बताए ।
कार्यक्रममा नेपाली काँग्रेसका जिल्ला सभापति एवं तिलोत्तमामा नगरपालिकाका नगर प्रमुख रामकृष्ण खाँण , नेकपा एमालेका जिल्ला अध्यक्ष यज्ञ गैरे , बुटवल उपमहानगरपालिकाका नगरप्रमुख खेलराज पाण्डे , बुटवल उपमहानगरपालिकाका पूर्व उपप्रमुख गुमादेवी आचार्य लगायतले मन्तव्य राखेका थिए ।
कार्यशालामा कार्यपत्र प्रस्तुतको क्रममा इलाका प्रशासन कार्यालय बुटवलका कार्यालय प्रमुख रामचन्द्र अर्यालले नीति, योजना बजेट ,कार्यक्रम तर्जुमा , कार्यकारी शक्ति र कार्य सम्पादन , विश्वसनीयता अभिवृद्धि , प्रशासनिक धारणा , कार्यपालिका बैठकबाट बजेट विनियोजन गर्ने परम्परा अन्त्य गर्ने , उपभोक्ता बाट काम भन्दा ठेक्काबाट गर्ने लगायतका विषयमा कार्यपत्र प्रस्तुत गरेका थिए ।
कार्यक्रमको सञ्चालन आधिकारिक ट्रेड युनियन रुपन्देहीका सचिव राम प्रसाद शर्माको रहेको थियो ।
