दाङ । लुम्बिनी प्रदेश सरकारले प्रदेश स्थापना दिवसलाई उत्सवको रुपमा मनाउँदैछ । आज सोमवार आठौं स्थापना दिवस उत्सवको रुपमा मनाउन थालेको हो । प्रदेश सभा सचिवालय परिसरमा मुल समारोहको आयोजना गरिँदैछ । प्रदेश प्रमुखको बिशेष उपस्थितिमा हुने मुल समारोह अघि बाजागाजासहितको झाँकी प्रदर्शन, विभिन्न मन्त्रालयहरुका स्टलहरूसमेत राखिने छन् ।
स्थापना दिवसलाई उत्सवमय बनाउन माघ २२सम्म प्रदेश मन्त्रालय, सचिवालय, निर्देशनालय र प्रदेशस्थित सबै कार्यालयमा दिपावलीगरी मनाउने कार्यक्रम राखिएको छ । शितगंगा नगरपालिका, लमही नगरपालिका, शिवराज नगरपालिका, गढवा गाउँपालिका, राप्ती गाउँपालिका, राजपुर गाउँपालिका, सरुमारानी गाउँपालिकाले आ–आफ्नो क्षेत्रभित्रको कला, संस्कृति र भेषभुषा सहित झाँकी प्रदर्शन गर्ने कार्यक्रम राखिएको छ ।
झाँकीहरूको वीचमा प्रतिस्पर्धा गरिने र प्रथम हुनेलाई २० हजार, दोस्रो हुनेलाई १५ हजार, तेस्रो हुनेलाई १० हजार रुपैयाँ पुरस्कारको व्यवस्था गरिएको छ । प्रदेश स्थापना दिवसमा लुम्बिनी प्रदेश सरकारले प्रदेशभर सार्वजनिक विदा समेत दिएको छ । लुम्बिनीले हरेक वर्ष माघ २१ लाई प्रदेशसभा स्थापना दिवस र फागुन ३ लाई सरकार स्थापना दिवसको रुपमा मनाउँदै आएको थियो । प्रदेश सरकारले दुई वटा दिवसलाई एकैदिन मनाउनेगरी माघ २१ लाई प्रदेश स्थापना दिवसको रुपमा मनाउने निर्णय गरेको थियो । सोही निर्णयको आधारमा माघ २१ लाई प्रदेश स्थापना दिवसको रुपमा मनाउन थालिएको हो ।
प्रदेश सरकारले सुशासन, पारदर्शिता र जवाफदेहितालाई प्रमुख प्राथमिकतामा राखेको दावी गरेको छ । कृषि, पर्यटन, उद्योग तथा पूर्वाधार विकासलाई समृद्ध लुम्बिनी, आत्म निर्भर प्रदेशको आधार बनाएर अघि बढेको प्रदेश सरकार नागरिकको भरोसा जित्न सफल भएको मुख्यमन्त्री चेतनारायण आचार्यले बताए । शिक्षा, स्वास्थ्य, पूर्वाधार, पर्यटन, सामाजिक सशक्तिकरण तथा सामाजिक सुरक्षा लगायतका काममा प्रदेश सरकारले काम गर्दै आएको भनाई उनको भनाइ छ ।
प्रदेश स्थापना दिवसको अवसरमा शुभकामना सन्देश जारी गर्दै मुख्यमन्त्री आचार्यले प्रदेश अहिले देखिने, अनुभवगर्न सकिने र नागरिकको दैनिकजीवनसंग जोडिन सफलभएको बताएका छन् । नागरिकको विकास प्रतिको तिब्र आकांक्षा पुरा गर्न, बनेका ऐन नियम तथा कानुनको पूर्ण कार्यान्वयन गर्न, प्रदेशको दिगोपना लगायत साझा सरोकारका मुद्धामा सबैसंग समन्वय र सहकार्यको माध्यमबाट अघि बढ्न चाहेको मुख्यमन्त्रीको भनाई छ ।
सभामुख तुलाराम घर्तीमगरले संघीय शासन प्रणालीको नयाँ संरचनाको रुपमा रहेको प्रदेशलाई स्थापित गर्न सरकारले शिक्षा, स्वास्थ्य, कृषि, रोजगार लगायतका सुविधा आधारभूत तहमा पराउन जरुरी रहेको बताए ।
