बुटवल । भारत उत्तरप्रदेशस्थित प्रयागराजमा जारी महाकुम्भ मेला सहभागी भएर फर्किँदै गर्दा भएको सवारी दुर्घटनामा परी रुपन्देही देवदहका ३ जनाको मृत्यु भएको छ ।
रुपन्देहीको देवदहबाट शुक्रबार ३५ जनाको टीम कुम्भमेला प्रस्थान गरेको थियो । मेलामा स्नान गरी फर्किँदै गर्दा सोमबार ७ जना सवार कार डिभाइडरमा ठोक्किएर दुर्घटना भएको हो ।
सो दुर्घटनामा परी देवदह–९ भलूहीका गणेश खनाल र उनकी श्रीमती दीपा खनाल र ४० वर्षकी गीता शर्माको निधन भएको इलाका प्रहरी कार्यालय बेलहिया (सुनौली) का इन्स्पेक्टर मुकेश न्यौपानेले जानकारी दिए । दुर्घटनामा ५ जना घाइते भएका छन् ।
घाइते हुनेहरुमा देवदह– ९ भलूहीकी कोपिला पोखरेल, उनका छोरा शुभम पोखरेल, आविष्कार पराजुली, यमकलादेवी मगर र सवारी चालक भारतीय नागरिक रितेश दुवे रहेका छन् ।यूपी ५३ एफ डी ४२८८ नम्बरको भारतीय कार सोमबार बिहान आजमगढ वाराणसी रोडको डिभाइडरमा ठोक्किएर दुर्घटना भएको हो ।
मृतक ४५ वर्षिय गणेश पेशाले गाडी चालक र फेन्सी पसले थिए । उनी रिजर्भमा गाडी चलाउंथे । श्रीमतीले पसल हेर्थिन् । गणेशका एक छोरा एक छोरी छन् । छोरी कक्षा १० मा र छोरा कक्षा ७ मा देवदहको सगरमाथा बोर्डिङ स्कूलमा पढ्छन् ।
घाइतेहरुलाई स्थानीय अस्पतालमा सामान्य उपचारपछि थप उपचारका लागि गोरखपुर पठाइएको छ । चालक निदाएर दुर्घटना भएको हुनसक्ने भारतीय प्रहरीको प्रारम्भिक अनुमान छ ।
मृतक गणेशका ७० वर्षका बुवाले महाकुम्भ मेलामा नजाऊ भनेका थिए । दुःखद घटनाका कारण भलूही शोकमा डुबेको देवदह नगरपालिकाका प्रवक्ता गणेश डुम्रेले बताए ।मृतकको शव नेपाल ल्याउने प्रक्रिया अघि बढाइएको बताइएको छ । भारतको प्रयागराजमा १४४ वर्षमा हुने महाकुम्भ मेला यसवर्ष चलिरहेको छ ।
कुम्भ मेला भने हरेक १२ वर्षमा चल्छ । दैनिक एक करोडभन्दा बढीले नदीमा स्नान गर्ने यो पवित्र स्थलमा भारतको सबैभन्दा पवित्र मानिने गंगा, यमुना र पौराणिक सरस्वती नदीको संगम समेत छ ।
