बुटवल । राष्ट्रिय यातायात उद्यमशील मजदुर भलाई कोष बुटवलले बिहीबार लुम्बिनी अपांग दृष्टिविहीन अनाथ आश्रमलाई खाद्यान्न सहयोग गरेको छ ।
उद्यमशिल भलाई कोषको १७औं स्थापना दिवसको अवसरमा बुटवल उप–महानगरपालिका वडा नम्बर १५ उजेलापुरमा रहेको अनाथ आश्रमलाई खाद्यान्न सहयोग गरिएको हो ।
संस्थाका महासचिव प्रकाश रिजालको नेतृत्वमा आश्रममा पुगी अनाथ आश्रमका अध्यक्ष लिलाराम रोकामगरलाई खाद्यान्न हस्तान्तरण गरिएको भलाई कोषका सह–सचिव दिनेशकुमार कसौधनले बताए ।
अनाथ आश्रममा १८ जना बालबालिका र १८ जना वयस्क नागरिक रहेका छन् । सामाजिक सेवाअन्तर्गत हरेक वर्ष संस्थाले विभिन्न क्षेत्रमा सहयोग गर्दै आएको भलाई कोषका सदस्य शत्रुधन शाहले बताए । संस्थाका कार्यालय प्रमुख बसन्तमान श्रेष्ठको सञ्चालनमा कार्यक्रम सम्पन्न भएको थियो ।
