बुटवल । संसदीय निर्वाचनको झल्को दिने गरी बुटवलको नयांगाउं खानेपानी संस्थामा नयां नेतृत्वका लागि भएको चुनावमा नेपाली कांग्रेस र राप्रपाको गठबन्धन विजयी भएको छ । गठबन्धनबाट अध्यक्षमा नेपाली कांग्रेसकी उम्मेदवार मिना घर्ती ८१४ मत पाएर निर्वाचित भएकी हुन् ।
एमाले–माओवादी र राष्ट्रिय जनमोर्चाको गठबन्धनबाट एमालेका नामबहादुर कुंवरले ८०८ मत पाए भने राष्ट्रिय स्वतन्त्र पार्टीका तर्फबाट वामदेव भुसालले ७५८ मत पाए ।
बुटवल उपमहानगरपालिकाका वडा नं १२ र १३ का ४७ सय घरधुरी मतदाता रहेकामा २६०६ मत खसेको थियो ।
निर्वाचनमा कांग्रेस–राप्रपाको एउटा तथा एमाले–माओवादी र राष्ट्रिय जनमोर्चाको अर्को गठबन्धन थियो भने राष्ट्रिय स्वतन्त्र पार्टीले एक्लै उम्मेदवारी दिएर दुबै गठबन्धनलाई कडा चुनौति दिएको छ । संसदको तेस्रो दल माओवादी केन्द्र भने यो निर्वाचनमा निकै कमजोर देखिएको छ ।
यस्तै उपाध्यक्षमा कांग्रेस र राप्रपाको गठबन्धनकी सिर्जना पौडेल ८१२ मत पाएर निर्वाचित हुंदा रास्वपाकी सिता ढकालले ७१८ मत र एमाले–माओवादी र राष्ट्रिय जनमोर्चाको गठबन्धनकी कल्पना केसी ६८४ मत प्राप्त गरेकी निर्वाचन समितिका सदस्य गोपाल पाण्डेले जानकारी दिए ।
सचिवमा एमाले–माओवादी र राष्ट्रिय जनमोर्चाको गठबन्धनका रामप्रसाद भुसाल ८४४ मत पाएर निर्वाचित हुंदा कांग्रेस–राप्रपा गठबन्धनका रामप्रसाद पन्थीले ७८७ मत तथा स्वतन्त्र उम्मेदवार भोजराज पाण्डेले ५६१ मत पाए । कोषाध्यक्षमा कांग्रेस–राप्रपा गठबन्धनकी सुमित्रा खनालले ७८९ मत पाएर निर्वाचित हुंदा एमाले–माओवादी र राष्ट्रिय जनमोर्चाको गठबन्धनकी गिता बरालले ५६४ मत र स्वतन्त्रकी तुल्सा अधिकारीले ६४२ मत पाएकी निर्वाचन समितिले जनाएको छ । सहसचिवमा एमाले–माओवादी र राष्ट्रिय जनमोर्चाको गठबन्धनका ढुण्डिराज खनाल ८७७ मत पाएर निर्वाचित हुंदा कांग्रेस–राप्रपा गठबन्धनका अम्बिका पन्थीले ७२५ र स्वतन्त्र उम्मेदवार रामबहादुर थापाले ५७५ मत पाएका छन् ।
अनुगमन समिति संयोजकमा कांग्रेसका गणेश आचार्यले र लेखा समिति संयोजकमा एमालेका अग्निप्रसाद पौडेल निर्वाचित भएका छन् । २३ सदस्यीय कार्यसमितिमा सदस्यहरुको मत परिणाम आउन बांकी रहेको निर्वाचन समिति सदस्य गोपाल पाण्डेले बताए ।
स्वतन्त्र उम्मेदवार वामदेव भुसालले दुईवटै गठबन्धनले सत्ताको दुरुपयोग गर्दै मत हाल्ने ठाउंसम्मै पुगेर मतदातालाई दवाव र प्रभावित गरेर परिणाम आफ्नो पक्षमा पारेपनि नैतिकरुपले आफूहरुले जितेको दावी गरे । ‘ठूला भनिएका दलले हामीलाई अस्तित्व नै छैन भनेर खिसिट्युरी गर्ने, हेप्ने र कतै प्रतिनिधित्व नगराउने प्रवत्ति थियो’–भुसालले भने–‘खानेपानी संस्थाको यो चुनावले ठूला दावी गर्ने दलहरु उनीहरु एक्लै चुनाव लड्न सक्दैनन् भन्ने देखाइदिएको छ ।’
उपभोक्ताका साझा संस्थाहरु कब्जा गरेर राजनीतिक र आर्थिक स्वार्थ पूरा गर्ने परिपाटीलाई आफूहरुले रोक्ने र महसुल घटाउन दवाव दिने भुसालले बताए ।
