तिर्थराज डुम्रे
चोरमारा
विनयी त्रिवेणी गाउँपालिकाले गाउँपालिका भित्रका मोतियाबिन्दु भएका व्यक्तिहरुको निःशुल्क शल्यक्रिया सुरु गरेको छ । गाउँपालिकाको विभिन्न पाँच वटा केन्द्रमा मोतियाबिन्दु परीक्षण गरेको थियो । सात सय ९५ जनाको मोतियाबिन्दु परीक्षण गर्दा एक सय ६१ जनालाई मोतियाबिन्दु देखिएको गाउँपालिकाका उपाध्यक्ष भगवती बैदवार क्षेत्रीले बताइन् ।
गाउँपालिकाले मोतियाबिन्दु भएका व्यक्तिहरुको छनोटका लागि नेत्रज्योति संघ नवलपरासी पूर्व र नेत्रज्योति संघ, भरतपुुर आँखा अस्पताल, चितवनसँगको समन्वयमा चैत्र ३ गते बेनिमणीपुर स्वास्थ्य चौकी सर्दी र कुडापानी स्वास्थ्य इकाईमा मोतियाबिन्दु परीक्षण गरिएको थियो । यस्तै चैत्र ४ गते विनयी त्रिवेणी गाउँपालिका वडा नं. ६ र ७ का लागि त्रिवेणी सुस्ता स्वास्थ्य चौकी, त्रिवेणीमा परीक्षण गरिएको उपाध्यक्ष बैदवारले जानकारी दिइन् । चैत्र ५ गते भानुदय माध्यामिक विद्यालय, दुम्कीबास र विनयी त्रिवेणी गाउँपालिका वडा नं. १ को वगुवन क्षेत्रमा मोतियाबिन्दु परीक्षण गरिएको हो ।
मोतियाबिन्दु परीक्षणबाट मोतियाबिन्दु देखिएका एक सय ६१ जनालाई बुधबार र बिहीबार भानुदय माध्यामिक विद्यालय दुम्कीबासमा शल्यक्रियाको व्यवस्था मिलाइएको गाउँपालिका अध्यक्ष घनश्याम गिरीले बताए । विगतमा मोतियाबिन्दु परीक्षण स्थानीयस्तरमा गरेर कावासोती, चितवन, हेटौडालगायतको स्थानमा शल्यक्रियाको लागि लगिने गरेकोमा यस पटक स्थानीयस्तरमा नै शल्यक्रियाको व्यवस्था मिलाइएको उनले बताए । गाउँपालिकामा गत वर्ष एक सय २६ जनाको मोतियाबिन्दुको शल्यक्रिया गरिएको थियो ।
विभिन्न स्थानमा गरिएको परीक्षण शिविरबाट मोतियाबिन्दु भएका व्यक्तिहरुको शल्यक्रिया गर्नुपूर्व सुगरलगायत अन्य परीक्षणहरु गरेपश्चात् मोतियाबिन्दुको शल्यक्रिया गरिने भरतपुर आँखा अस्पताल चितवनकी डा. पुष्पा गिरी श्रेष्ठले जानकारी दिइन् । परीक्षणको क्रममा अधिकांशमा उमेरसँगै देखिने मोतियाबिन्दु देखिएको उनले बताइन् ।
मोतियाबिन्दु शल्यक्रियाका लागि पालिकाको विभिन्न स्थानबाट बुधबार बिहानैबाट शल्यक्रिया हुने भानुदय मा.वि. मा मोतियाबिन्दु भएका व्यक्तिहरु आइपुगेका थिए । नेत्रज्योति संघ, नवलपरासी पूर्वले विनयी त्रिवेणी गाउँपालिकालाई गरेको अनुरोध अनुरुप गाउँपालिकाको समेत अग्रसरतामा मोतियाबिन्दु परीक्षण शिविर र शल्यक्रिया सम्भव भएको संघका जिल्ला सचिव उदयराज सिग्देलले बताए । हुप्सेकोट गाउँपालिकामा समेत तत्काल मोतियाबिन्दु परीक्षण र शल्यक्रिया कार्य सञ्चालनको तयारीमा रहेको उनले जानकारी दिए ।
आँखाको शल्यक्रिया पस्चात आँखा देख्ने विश्वास शिविरमा सहभागी मोतियाबिन्दु भएका व्यक्तिहरुको छ । नवलपुर जिल्लामा विभिन्न संस्थाको आयोजनामा प्रत्येक वर्ष मोतियाबिन्दु परीक्षण तथा शल्यक्रिया हुँदै आएको छ । यद्यपी उमेर अनुसार हुने मोतियाबिन्दुको दर उच्च रहेको मोतियाबिन्दु शल्यक्रियाका लागि काम गरिरहेको नेतज्योती संघ नवलपरास पूर्वका सदस्य दिवाकर पौडेलले जानकारी दिए ।
