भैरहवा । २०४८ सालमा सुरुवात भएको स्वर्णकार क्रिकेट प्रतियोगिता यस वर्षदेखि निरन्तर हुने भएको छ ।
रुपन्देहीका युवा सुनचाँदी व्यवसायीहरुले सुरुवात गरेको यो प्रतियोगिता करिब ३ दशक पछि पुस्तान्तरण हुदै विश्वकर्मा युवा समाजको आयोजनामा हुन लागेको हो ।
जिल्लामा क्रिकेट खेलको विकाससँगै युवाहरुमा खेल प्रति उत्सुकता जगाउदै एक अर्कामा सम्बन्ध प्रगाढ गर्ने उद्देश्यका साथ प्रेम कुमार सेञ्चुरी, श्याम कुमार सुनार र डम्बरलाल रामदाम लगायतको सक्रियतामा २०४८ सालबाट सुरुवात भएको थियो । सुनचादीमामात्रै सिमति नरही छरिएर रहेका समाजका युवाहरुलाई एकजुट बनाउने उद्देश्य सहित प्रतियोगिताको आयोजना गर्न लागिएको छ ।
२०५३ साल सम्म निरन्तर भएको स्वर्णकार क्रिकेट प्रतियोगिता यस वर्ष देखि निरन्तर गर्ने अठोटका साथ १२ टिमको सहभागितामा प्रतियोगिता आयोजना हुन लागेको छ । विश्कर्मा युवा समाजको नेतृत्वमा यस वर्ष चैत्र ३० गते शनिबारको दिन स्वर्णकार सुपर सिक्स क्रिकेट प्रतियोगिता गर्न लागिएको समाजको अध्यक्ष अमित सेन्चुरीले जानकारी दिए ।
रुपन्देहीका विभिन्न क्षेत्रबाट विश्वकर्मा समाजका युवाहरुको सहभागितामा १२ टिमको सहभागितामा सुपर सिक्स प्रतियोगिता भैरहवा स्थित सिद्धार्थ क्रिकेट मैदानमा गर्न लागिएको हो । सहभागी टिमलाई समूहमा विभाजन गरि नकआउट चरणमा प्रतियोगिता आयोजना हुनेछ । प्रतियोगिता आईसीसी सुपर सिक्स टुर्नामेन्टको नियम अनुसार क्रिकेट एसोसिएसन अफ रुपन्देहीको प्रविधिक सहयोग र समन्वयमा हुने समाजले जानकारी दिएको छ ।
प्रतियोगिताको विजेता टिमलाइ रनिङ सिल्ड सहित खसी प्रदान गरिने छ भने म्यान अफ द म्याच, मेन अफ द सिरिज, बेस्ट बलर, बेस्ट ब्याटर लगायतलाई ट्रफी र प्रमाणपत्रको व्यवस्था गरिएको जनाए ।
स्वर्णकार प्रतियोगितामा संस्थापक संयोजक श्याम सुनारले सुनचादी व्यवसायीको हकहित र व्यवसायिक संरक्षण र सम्वद्र्धन गर्दै सामाजिक क्रियाकलाप गर्नका लागि स्वर्णकार समिति बनेको बताए । सुरुवाती चरणमा २०४८ सालबाट लगातार ५ वटा क्रिकेट प्रतियोगिता एसएसपी कार्यालयमा गरेपनि केही समय रोकिएकोले यस वर्ष नयाँ पिडीले यस्को सुरुवात गरेर जिवन्त बनाउन लागेको बताए ।
अर्का संस्थापक सदस्य प्रेम कुमार सेन्चुरीले स्वास्थ्य प्रति संवेदनशील नभएकोले स्वर्णकार समितिले क्रिकेट मात्रै होइन फुटवल पनि ३–४ वर्ष आयोजना गरेको बताए । सधै व्यवसायमा व्यस्त हुनु भन्दा पनि केही समय स्वास्थ्य र राष्ट्रका लागि पनि दिनुपर्छ भन्दै हामीले यस्को सुरुवात गरेको बताए । यही समाजकै अगुवाईमा रुपन्देही क्रिकेट संघको स्थापना गरिएको समेत सेन्चुरीले भने ।
स्वर्णकार समितिका संयोजक डम्बरलाल रामदामले पुर्नजीवित भएको यो समाजले धेरै भन्दा धेरै युवाहरुलाई एकजुट गराई समाजलाई बृहत बनाउनु पर्ने बताए । सुनचादी व्यवसायीलाई मात्रै होइन सबै शिल्पकारलाई यसमा समेटेर लैजानु पर्छ । खेल मात्रै नभई समाजिक काममा पनि युवाहरुले नेतृत्व लिई यस क्षेत्रको ऐतिहासिक विश्वकर्मा मन्दिरलाई संरक्षण र उचित व्यवस्थापन गर्न समेत अनुरोध गरे ।
रुपन्देही क्रिकेट संघका अध्यक्ष हरि बहादुर थापाले २०४८ सालदेखि निरन्तर ५ वर्ष चलेको प्रतियोगिता पुनः निरन्तरता पाउनु क्रिकेटको विकासको लागि राम्रो पक्ष हो । युवाहरुलाई समेटेर जुन प्रकारको अगुवाई समाजले गरेको छ यस्मा रुपन्देही क्रिकेट संघ सहकार्य गरी सफल बनाउनमा पनि उत्तिकै जिम्मेवार रहने बताए ।
