बुटवल । रूपन्देहीको देवदहस्थित कोलिय देवदह बचत तथा ऋण सहकारी संस्थाको सेवा केन्द्रमा गएराति चोरी भएको छ ।
सहकारीको घोडाहा सेवा केन्द्रको झ्याल तोडेर कार्यालय प्रवेश गरी ८ लाख ४३ हजार नगद लुटपाट भएको छ । सहकारीको झ्याल फोडेर कार्यालय प्रवेश गरी भल्टमा राखिएको ८ लाख ४३ हजार ७८९ रूपैयाँ चोरी भएको संस्थाका व्यवस्थापक विनोद पराजुलीले जानकारी दिए ।
‘घटनाबारे प्रहरीले अनुसन्धान गरिरहेको छ । चोरले सीसीटीभी क्यामेराको हार्डडिस्क समेत लगेको पाइयो’, पराजुलीले भने । देवदह प्रहरी चौकीका इन्चार्ज एक्कबहादुर नेपालीले पनि सहकारीको भल्ट नै फोडेर नगद चोरी भएको जानकारी दिए । प्रहरीले सहकारीको आर्थिक कारोबारसमेत अध्ययन हुने जनाएको छ ।
कतिपय सहकारीमा कारोबार बिग्रेको र त्यसलाई मिलाउन पनि चोरीका घटना घटाइने गरेको इतिहास रहेको उल्लेख गर्दै प्रहरीले सहकारीको समितिका पदाधिकारी र कर्मचारीहरूको आचरणसमेत अध्ययन गरिने जनाएको छ ।
