अविजित पन्थी
रूपन्देही
‘आमा र जन्मभूमि स्वर्गभन्दा पनि प्यारो हुन्छ’ भन्ने मूल नाराका साथ अड्गुरी समाज रूपन्देहीले आफ्नो १२औँ वार्षिक साधारणसभा रूपन्देहीको बुटवलस्थित एशियन पार्टी प्यालेसमा सम्पन्न गरेको छ । समाजले आफ्नो संस्थागत जीवनको एक दशक नाघी दोश्रो दशक प्रवेश गरेको यस साधारणसभाले संस्थाको अबको दिशा र गति स्पष्ट पार्दै नयाँ ऊर्जा सञ्चार गरेको छ ।
कार्यक्रमको स्वागत मन्तव्य समाजका उपाध्यक्ष नारायणप्रसाद घिमिरेले राखेका थिए । स्वागत मन्तव्यका क्रममा उनले समाजको १२ वर्षे यात्रालाई समर्पण, सहयोग र निरन्तरताको प्रतीकका रूपमा चित्रित गर्दै, सबै सदस्यहरूको सक्रिय सहभागिताले समाजलाई अझ मजबुत बनाएको उल्लेख गरे ।
कार्यक्रमको उदटन समाजका संस्थापक अध्यक्ष तथा पाणिनी गाउँपालिकाका अध्यक्ष टेकराज न्यौपानेले बिरुवामा पानी हालेर गरेका थिए । यसको सांकेतिक अर्थ समाज रूपी बिरुवालाई माया, समर्पण र सहकार्यको पानीले सिंचित गर्नुपर्ने सन्देश थियो । आफ्नो मन्तव्यमा उनले संस्थालाई राजनीतिक हस्तक्षेपबाट टाढा राख्दै, उद्देश्यपरक र समावेशी रूपमा अघि बढाउन आवश्यक रहेको धारणा राखे । “संस्थाको जरा बलियो बनाएर मात्र बिरुवा रुख बन्न सक्छ, यही सूत्र समाजको सफलताको मूल मन्त्र हो ।”– उनको प्रेरणादायी भनाइ थियो ।
विशिष्ट अतिथिको रूपमा उपस्थित पाणिनी गाउँपालिका–७ का वडाध्यक्ष गुनाखर अधिकारीले गाउँमै सिर्जनशीलता र सीपलाई जीवन्त बनाउने खालको वातावरण तयार पार्नुपर्नेमा जोड दिए । गाउँका युवाहरूलाई सीपमूलक तालिममार्फत सशक्त बनाउन सकिएमा मात्रै समाजको मुहार बदल्न सकिने उनको धारणा थियो ।
कार्यक्रमको अध्यक्षता समाजका वर्तमान अध्यक्ष रामप्रसाद पन्थीले गरेका थिए । उनले विगत वर्षभरिको कार्य प्रतिवेदन प्रस्तुत गर्दै संस्थाले सञ्चालन गरेका कार्यक्रमहरू नेतृत्व विकास तालिम, स्वास्थ्य शिविर, छात्रवृत्ति वितरण, महिला बचत योजना, आपसी सहयोग परियोजनालगायतका विषयमा विस्तृत विवरण प्रस्तुत गरेका थिए ।
समाजका कोषाध्यक्ष माधव आचार्यद्वारा प्रस्तुत आर्थिक प्रतिवेदनमा आम्दानी–खर्चको पूर्ण लेखाजोखा राखिएको थियो । यसमा प्राप्त सहयोग सदस्यता शुल्क, कार्यक्रम खर्च र कोषको वर्तमान अवस्था उल्लेख गरिएको थियो ।
साधारणसभामा पाणिनी गाउँपालिकाभित्रका विभिन्न वडाका क्रियाशील सम्पर्क समाजका अध्यक्ष तथा प्रतिनिधिहरूले मन्तव्य राख्दै अड्गुरी समाज रूपन्देहीले गाउँ र शहरबीचको दूरीलाई सामाजिक भावनात्मक पुलले जोडिरहेको उल्लेख गरेका थिए । उनीहरूले संस्थाले गरेको कार्यलाई उदाहरणीय, समय सापेक्ष र समुदायमैत्री भएको ठहर गरे ।
समाजका पूर्व अध्यक्ष तथा सल्लाहकार लुकराज न्यौपानेले संस्थाले शहरमा रहेर पनि गाउँको भावना बोकेको उल्लेखनीय संस्था बन्न सफल भएको बताए । “गाउँको पीडा बुझ्ने, शहरमा स्वर उठाउने र दुवैलाई जोड्ने काम समाजले गरिरहेको छ ।”– उनले भने ।
सभाको विशेष आकर्षणमा, समाजका आजीवन सदस्यहरूलाई सम्मानपत्र प्रदान गरिएको थियो भने ८० वर्ष नाघेका अड्गुरी क्षेत्रका आमाबुबाहरूलाई खादा र दोसल्ला ओढाएर सम्मान गरिएको थियो ।
समाजले गत वर्ष २२ जना विद्यार्थीलाई शैक्षिक सामग्री वितरण गरेको थियो भने अड्गुरी स्वास्थ्य चौकीमा सञ्चालन गरिएको शिविरमार्फत् २ लाख ५० हजार रुपैयाँ बराबरको औषधि र उपचार सेवा प्रदान गरिएको थियो । यसरी समाजले स्वास्थ्य, शिक्षा र समावेशी सेवाको प्रभावकारी उदाहरण प्रस्तुत गरेको थियो ।
अड्गुरी समाज रूपन्देहीलाई अझ योजनाबद्ध, उत्तरदायी, समावेशी र प्रगतिशील सामाजिक संस्थाको रूपमा अगाडि बढाउने मार्ग स्पष्ट पारेको छ । ग्रामीण परिवेशको मर्म बुझेको, शहरी जीवनशैलीसँग समन्वय गर्न सक्ने र सामाजिक उत्तरदायित्वलाई आत्मसात गर्ने यो समाज अबको दिनमा अन्य समुदायका लागि पनि प्रेरणा बन्ने सम्भावना प्रबल देखिएको छ ।
