बुटवल । रुपन्देहीको तिलोत्तमा नगरपालिका ‘सहयोगापेक्षी सडक आश्रित मानवमुक्त’ घोषणा भएको छ ।
मंगलबार प्रदेशका सामाजिक विकास मन्त्री,जिल्ला समन्वय समिति प्रमुख, नगरभित्रका विभिन्न राजनैतिक दलका प्रतिनिधिहरू र संघसंस्थाको उपस्थितिमा नगरप्रमुख रामकृष्ण खाँणले नगरलाई मानवसेवा आश्रमसँगको सहकार्यमा सहयोगाापेक्षी सडक आश्रित मानवमुक्त नगर बनाइएको घोषणा गरे । उनले उक्त घोषणापत्र मानवसेवा आश्रमका अध्यक्ष रामजी अधिकारीलाई हस्तान्तरण गरेका थिए ।
सो अवसरमा बोल्दै सामाजिक विकास मन्त्री जन्मजय तिमिल्सेनाले संविधानले नै हरेक नागरिक सम्मानपूर्वक बाँच्न पाउने अधिकार सुनिश्चित गरे पनि विभिन्न कारणले कतिपय व्यक्ति सडक जीवन जिउन बाध्य भएको बताए । उनले मानवीय सेवाभन्दा ठूलो धर्म अरु नहुने भन्दै मानवसेवा आश्रमको अभियानमा सबैको साथ हुनुपर्ने बताए ।
नगरप्रमुख खाँणले प्रशासनिक घोषणा मात्र नभई व्यवहारमा प्रभावकारी कार्यान्वयन गरिने प्रचिबद्धता जनाए । आश्रमका केन्द्रीय अध्यक्ष रामजी अधिकारीले २०८२ सालभित्र स्थानीय तह, सातै प्रदेश र यही वर्षको अन्तसम्ममा नेपाललाई नै ‘सहयोगापेक्षी सडक आश्रित मानवमुक्त’ घोषणा गर्ने तयारी रहेको बताए ।
मानवसेवा आश्रमले कोही पनि मानिस बेवारिसे भएर सडकमा जीवन बिताउन नपरोस् भन्ने उद्देश्यले १३ वर्षअघिदेखि सहयोगापेक्षी सडक आश्रित मानवहरूका लागि उपचार र उपचारपछि खाना, नाना, छाना, स्वास्थ्य र शिक्षाको व्यवस्थापन गर्दै आएको छ ।
तिलोत्तमा नगरपालिकाको वडा नं. ६ स्थित मानवसेवा आश्रममा १४६ जना आश्रित रहेको वडाध्यक्ष गणेश पाठकले बताए ।
