तिलोत्तमा । होराइजन जीबीएस मा.वि.मा अतिरिक्त क्रियाकलाप शाखाद्वारा आयोजित तीन दिने प्रशिक्षणात्मक कार्यशाला सम्पन्न भएको छ । बैशाख २२ देखि २४ गतेसम्म सञ्चालित यस प्रशिक्षण कार्यक्रममा कक्षा ७ देखि १० सम्मका अभिरुचि भएका करिव १०० जना विद्यार्थी सहभागी थिए । कार्यक्रमको पहिलो दिन चित्रकला तथा वक्तृत्वकला– वादविवाद, दोस्रो दिन मूर्तिकला तथा निबन्ध –प्रतिवेदन लेखन र तेस्रो तथा अन्तिम दिन मूर्तिकलासहित लघुकथा एवम् मुक्तक गजल लेखनका प्रशिक्षणहरु चलेका थिए ।
प्रशिक्षण कार्यक्रममा चित्रकला तथा मूर्तिकला प्राज्ञ गोविन्द चौधरी वक्तृत्व, वादविवाद, निबन्ध तथा प्रतिवेदन साहित्यकार डा. मुरारि पराजुली, लघुकथा साहित्यकार रुद्र ज्ञवाली र गजल मुक्तक रमेश समर्थनले सहजीकरण गरेका थिए । कार्यक्रमको अन्यमा विद्यार्थीहरुद्वारा कार्यशालामा सृजित रचनाको मूल्याङ्कन गरी पुरस्कृत गरिएको थियो भने सहजकर्ताहरुलाई मायाको चिनोले सम्मान गरिएको थियो ।
कार्यक्रममा प्राचार्य गोपालप्रसाद आचार्य, उप–प्राचार्यद्वय इन्द्र भुसाल, ज्ञानेश्वर ज्ञवाली, शैक्षिक निर्देशक लक्ष्मणप्रसाद गौतम र जीवनाथ भण्डारी र प्राध्यापक प्रदिप अर्यालको उपस्थिति रहेको थियो ।
सम्पूर्ण कार्यक्रमको संयोजन नेपाली विषय विभागीय प्रमुख मोहन मरासिनीले गरेका थिए ।
