नवलपरासी ।
नवलपुरको त्रिवेणी र पश्चिम नवलपरासीको भैसालोटन लगायतको क्षेत्रमा आज विहानदेखि ७२ घण्टालाई सीमा सिल गरिएको छ ।
भारतको विहार राज्यको विधान सभाको निर्वाचनलाई लक्षित गरी भारत विहार सँग जोडिएको नवलपुर, पश्चिम नवलपरासी सहित बारा, पर्सा, रौटहटदेखि झापासम्म सीमा सिल गरिएको हो ।
नवलपुरका प्रमुख जिल्ला अधिकारी भविश्वर पाण्डेले भारतीय अधिकारीहरुको आग्रहमा आइतबार विहान ६ बजेदेखि मंगलबार साँझ ६ बजेसम्मका लागि सिमा बन्द गरिएको हो ।
नवलपुर र पश्चिम नवलपरासीको केही भूभाग भारतको विहार राज्यको पश्चिम चम्पारण जिल्लासँग सीमा जोडिएको छ ।
यता पश्चिम नवलपरासीका प्रमुख जिल्ला अधिकारी कृष्णप्रसाद लम्सालले आफूहरुले नेपालको तर्फबाट सिमा शिल गरेको नभएपनि भारतीय पक्षले पश्चिम नवलपरासीको भैसालोटन नाकामा भने सिमा बन्द गरेको जानकारी दिए । कार्तिक २५ गते हुन लागेको बिहार विधान सभाको दोस्रो चरणको निर्वाचनलाई मध्य नजर गर्दै यस क्षेत्रमा सिमा नाका बन्द गरिएको हो ।
