बुटवल । माघे संक्रान्तिको अवसरमा माघ १ गते बुटवलमा ‘रम्मिताको पिरती’ सांगीतिक कार्यक्रम (म्युजिकल कन्सर्ट) हुने भएको छ ।
प्रेम, संगीत र प्रत्यक्ष सांगीतिक प्रस्तुतीको भव्य उत्सवका रूपमा ‘रम्मिताको पिरती’ म्युजिकल कन्सर्ट बुटवलमा हुने भएको हो ।
माघ १ गते बुटवल मण्डपस्थित अन्तराष्ट्रिय सम्मेलन केन्द्र बिआइसीसी प्रांगणमा कार्यक्रम हुने आयोजकले जनाएको छ ।
इभेन्ट इन बुटवल र माकाडक्स इभेन्टको संयुक्त आयोजनामा हुन लागेको उक्त सांगीतिक कार्यक्रममा समिर श्रेष्ठ फिचरिङ, गुडबोइज, द हुलाकी, कुशल पोखरेल, महेश काफ्ले, आना शर्मा, धिराज मगरलगायतका कलाकारहरुको प्रस्तुती दिनेछन् । साथै कार्यक्रममा एक विशेष ‘सरप्राइज आर्टिस्ट’ को समेत प्रस्तुति रहने आयोजकले जानकारी दिएको छ ।
‘रम्मिताको पिरती’ फिल्मको सांगीतिक टुर कार्यक्रम अन्तर्गत कार्यक्रममा सांगीतिक कार्यक्रम गरि टुरको सुरुवात गरिने भएको छ ।
इभेन्ट इन बुटवलका सञ्चालक अतीत थापाका अनुसार प्रेम र सांगीतिक भावनालाई केन्द्रमा राखेर तयार गरिएको यो कार्यक्रम युवापुस्ताका लागि विशेष आकर्षणको केन्द्र बन्ने अपेक्षा गरिएको छ ।
माकाडक्स इभेन्टका कोर्डिनेटर सन्देश केसीले कार्यक्रममा करिब तीन दर्जन कलाकार तथा प्राविधिकको सहभागिता रहने जानकारी दिए । उनका अनुसार कार्यक्रमको तयारी तिब्र पारिएको र दर्शकलाई गुणस्तरीय लाइभ म्युजिक अनुभव गराउने लक्ष्य लिइएको छ ।
दर्शकका लागि ५ सय रुपैयाँ प्रवेश शुल्क तोकिएको छ भने टिकट ई–सेवा स्क्यानमार्फत सहज रूपमा लिन सकिने व्यवस्था गरिएको छ । अपराह्न ३ बजेदेखि गेट खुल्ने थापाले जनाए ।
साथै, कन्सर्टमा टिकट खरिद गर्ने दर्शकहरुले फ्रेन्स सिनेमा ‘रम्मिता को पिरती’ फिल्म निःशुल्क हेर्ने अवसर समेत पाउने आयोजकले जनाएको छ । इभेन्ट इन बुटवलका सञ्चालक अतीत थापाका अनुसार हालसम्म करिब १ हजार टिकट बिक्री भइसकेको र थप १ हजार टिकट बिक्री गर्ने लक्ष्य राखिएको छ ।
बुटवल इभेन्टको होस्ट राजेश सिन्जालीले गर्ने बताइएको छ । बुटवलबाट सुरु हुने ‘रम्मिता को पिरती’ म्युजिकल कन्सर्ट काठमाण्डौ, पोखरा, चितवन, दाङ, नेपालगन्जलगायतका स्थानमा हुने समेत थापाले जनाए ।
