बुटवल
तत्कालीन नेकपा एमाले र माओवादी केन्द्र मिलेर बनेको नेकपाकालमा रामकुमारी झाँक्री तत्कालीन प्रधानमन्त्री एवं पार्टी अध्यक्ष केपी शर्मा ओलीको कटु आलोचक थिइन् ।
ओलीले संसद विघटन गरेका बेला प्रचण्ड–माधव समूहले गरेको सभामा रामकुमारीले ओलीले बोल्न नदिएको लक्षित गर्दै मुखमा कालो टेप टाँसेर ‘बोल्न पाइन्छ’ भन्दै टेप उप्काएर ब्यङ्ग्य गरेकी थिइन् ।
उनले ओलीलाई कागजी बादशाहको संज्ञा दिनेदेखि थुप्रै विषयमा आलोचना गरेकी थिइन् । नेकपा विभाजनपछि एमालेमा विवाद चर्किंदै जाँदा रामकुमारीले माधव नेपालको हात समाएर पार्टी विभाजन गरी नेकपा एकीकृत समाजवादी गठनमा अगुवाइ गरेकी थिइन् ।
जुन दललाई ओलीले कहिल्यै मान्यता दिएनन् । बरु एकीकृत समाजवादी गठनमा लागेका १० सांसदलाई पदमुक्त गर्न माग गर्दै एमालेले लामो समय संसद अवरुद्ध ग¥योे । यी सबै घटनाक्रमको केन्द्रमा रामकुमारी पनि जोडिएकी थिइन् ।
२०७८ सालमा एमाले विभाजन भएपछि उनी नेकपा (एकीकृत समाजवादी) मा आबद्ध भइन् र उक्त पार्टीको सचिव भइन् । यही दलको तर्फबाट उनी शेरबहादुर देउवा नेतृत्वको सरकारमा शहरी विकास मन्त्री (२०७८–२०७९) को जिम्मेवारीमा पुगिन् ।
मन्त्रीबाट राजीनामा दिनुपर्दा रोएको घटनाले उनी आलोचित हुन पुगिन् । २०७९ सालको प्रतिनिधिसभा निर्वाचनमा उनी गुल्मी–२ बाट प्रत्यक्ष उम्मेदवारका रूपमा एमालेका गोकर्ण विष्टसँग प्रतिस्पर्धा गरिन्, तर पराजित भइन् ।
तीन महिनाअघि मात्रै नेकपा एमालेमा फर्किएपछि उनले ओलीको प्रशंसा गर्न थालिन् । एमालेको महाधिवेशनमा पनि ओली समूहबाट केन्द्रीय सदस्य निर्वाचित भइन् ।
एमाले प्रवेश गरेको छोटो समयमै ओलीसँग नजिकिएपछि उनले राष्ट्रियसभा सदस्यको टिकट पाइन् र कांग्रेससँगको गठबन्धनबाट लुम्बिनी प्रदेशबाट महिलातर्फ सहज जित हासिल गरिन् । लामो समय ओलीको कटु आलोचक रहेकी रामकुमारीले ओलीको मन पगालेर टिकट हात पार्नुलाई धेरैले अचम्म मानेका छन् । एमाले अध्यक्ष केपी ओली त्यस्ता नेता हुन् जसले आफ्नो आलोचना गर्ने नेता कार्यकर्ताको एक एक हिसाब राखेका हुन्छन् । आफूसँग भिन्न मत राख्नेलाई ओलीले ‘भीम रावल बनाइदिन्छन्’ भन्ने भाष्य नै बनेको छ ।
हुन पनि यसपाली एमाले महाधिवेशनमा होस् वा प्रतिनिधिसभा सदस्यको उम्मेदवार चयनमा ओलीले आफूसँग फरक मत राख्ने नेताहरुलाई ‘कर्नर’मा पु¥याइदिए । पार्टी पूर्व उपाध्यक्ष सुरेन्द्र पाण्डे, उप–महासचिव योगेश भट्टराई, पूर्व सचिव गोकुल बास्कोटा, विन्दा पाण्डेलगायतलाई ओलीले टिकट दिएनन् ।
तर गुल्मी २ बाटै प्रतिनिधिसभा सदस्यकी आकांक्षी रामकुमारीलाई राष्ट्रियसभामा व्यवस्थापन गरेर पार्टीका उपाध्यक्ष गोकर्ण विष्टलाई प्रतिनिधिसभा सदस्य उम्मेदवार बनाउन ओलीले बुद्धिमानी निर्णय गरेको एमाले नेताहरु टिप्पणी गर्छन् ।
२०३५ जेठ ९ गते गुल्मी जिल्लामा जन्मेकी रामकुमारी विद्यार्थी जीवनदेखि नै राजनीतिमा सक्रिय थिइन् । उनी अखिल नेपाल राष्ट्रिय स्वतन्त्र विद्यार्थी युनियनको अध्यक्ष बन्ने पहिलो महिला नेतृ हुन् । २०६२-०६३ को जनआन्दोलनका क्रममा उनी सडक आन्दोलनको अग्रपंक्तिमा रहेर राजतन्त्रविरुद्ध खुलेर उभिइन् । त्यसै आन्दोलनका क्रममा उनी पटक–पटक पक्राउ परिन्, जसले उनलाई आम जनतामाझ एक साहसी र संघर्षशील नेतृको रूपमा चिनायो ।
२०७४ मा समानुपातिक प्रणालीमार्फत् संघीय संसदको प्रतिनिधिसभा सदस्य बनेकी रामकुमारी २०७९ को प्रतिनिधिसभा निर्वाचनमा भने गुल्मी–२ मा नेकपा एकीकृत समाजवादीबाट प्रत्यक्ष प्रतिस्पर्धामा उत्रिइन् । तर एमालेका गोकर्ण विष्टसँग पराजित भइन् । आइतबार भएको राष्ट्रियसभा निर्वाचनमा निर्वाचित भएसँगै झाँक्री पुनः संघीय संसदमा फर्किएकी छन् । बेलाबेला अस्वभाविक र उत्तेजक अभिव्यक्तिका कारण झाँक्रीले बेला बेला आलोचनाको शिकार बन्ने गरेकी छन् ।
विगतमा झाँक्रीको विशेषता भनेको उनी पार्टी अनुशासनभन्दा बाहिर गएर पनि विचार राख्न तयार हुन्थिन् । तर अब केपी ओलीसँगको निकटताले अबका दिनमा कसरी प्रस्तुत हुन्छिन् त्यो हेर्न बाँकी छ ।
