भैरहवा । रुपन्देही क्षेत्र नं ३ को चुनावी प्रतिस्पर्धा रोचक मोडमा पुगेको छ । यहां नेकपा एमालेका बासुदेव घिमिरे, नेपाली कांग्रेसका शुशिल गुरुङ, राप्रपाका गौरव बोहरा, रास्वपाका डा. लेखजंग थापा, नेकपाका फैज अहमद खान, महेन्द्र यादव, जितबहादुर गुप्ता लगायतले प्रतिस्पर्धा गरेका छन् । 
खासगरी राष्ट्रिय स्वतन्त्र पार्टी छाडेर जितबहादुर गुप्ता जेबी र महेन्द्र यादवको उम्मेदवारीले एमालेका बासुदेव घिमिरे बलियो बनेका छन् भने रास्वपा उम्मेदवार लेखजंग थापा कमजोर बनेको दावी गरिएको छ । रास्वपा छाडेका दुई उम्मेदवारले डा. लेखजंगको पक्षमा जाने मत काट्ने देखिएको छ । 
जेबी गुप्ता २०७९ को चुनावमा रास्वपाका उम्मेदवार थिए । उनले ५८ सय मत पाएर तेस्रो भएका थिए । तर पार्टीको भनाई र गराईमा आकाश जमिनको फरक भएको भन्दै पार्टी छाडेर बसेका उनी स्वतन्त्र उम्मेदवार बनेका छन् । 
महेन्द्र यादव मधेश आन्दोलनबाट उदाएका भैरहवाका चर्चित नेता हुन् । उनी केही समय अघि मात्रै जसपा नेपाल छाडेर रास्वपामा गएका थिए । उनलाई रास्वपाले रुपन्देही ४ मा उम्मेदवारका लागि एकल सिफारिश समेत गरेको थियो । 
तर अन्तिममा आर्थिक चलखेलका कारण कन्हैया बानियालाई टिकट बेचेर पार्टी प्रवेश गराएको भन्दै यादवले स्वतन्त्र उम्मेदवारी दिएका छन् । पुराना दल भन्दा राम्रो होला भन्ने विश्वास गरेर रास्वपा प्रवेश गरेपनि व्यवहार पुरानाको भन्दा झन् खराब देखिएकाले पार्टी छाडेर स्वतन्त्र उम्मेदवारी दिएको यादवले बताए । 
रुपन्देहीमा रास्वपा स्थापना गर्ने मध्येका एक जेबी गुप्ता पनि पार्टीको भनाई र गराईमा आकाश जमिनको फरक भएको पाएपछि पार्टी छाडेर स्वतन्त्र उम्मेदवार बन्दा उनले पनि रास्वपाकै मत काट्ने देखिन्छ । 
  
उता  तिलोत्तमा नगरपालिकाको सफल मेयरको रुपमा चर्चित र रुपन्देही ५ मा संघीय सांसदको चुनाव भारी मतान्तरले जितेका बासुदेव घिमिरे रुपन्देही ३ मा बलियो उम्मेदवारका रुपमा देखिएका छन् । 
 विगतमा राम्रो काम गरेका र  निजी क्षेत्र तथा युवा पुस्ताको मुद्दा उठाइरहने घिमिरे मजबुद पार्टी संगठनका कारण उनको पक्षमा राम्रो माहोल देखिएको हो । 
घिमिरे विगतमा आफूले जिम्मेवारी पाउँदा त्यसलाई कुशलतापूर्वक सम्पन्न गरेको भन्दै मतदाताको माझमा पुगेका छन् ।

तिलोत्तमाको नगर प्रमुख हुँदा उत्कृष्ट कार्य सम्पादन गरेको, संघीय सांसद रहँदा संसद्मा जनताका आवाजलाई बुलन्द पारेकाले अब अवसर पाउँदा थप राम्रो काम गर्न सक्ने उनको भनाइ छ ।
रास्वपाका उम्मेदवार डा. थापालाई आफ्नो पेशामा अब्बल हुंदाहुंदै पनि राजनीतिक महत्वाकांक्षा राख्ने पात्रका रुपमा मतदाताले हेर्ने गरेका छन् । 
 दल बदल्दै राजनीतिक अवसर लिन खप्पीस व्यक्तिका रुपमा उनलाई हेरिएको छ । 
उनी यसअघि नागरिक उन्मुक्ति पार्टीबाट प्रदेश सभामा समानुपातिक उम्मेदवार थिए । उनले आफ्नी एक श्रीमतीलाई प्रदेश योजना आयोगको सदस्यमा नियुक्ति समेत दिलाएका थिए । 
रुपन्देही ३ को उपनिर्वाचनका बेला रास्वपा प्रवेश गरेर टिकट पाएपछि उनी विवादमा तानिए । दुई श्रीमतीको लफडा, आफ्नो क्षेत्रमा खटेर पार्टीमा कामै नगरेको अवस्थामा पनि प्राइमरी इलेक्सनमा सबैभन्दा बढी मत पाएको भन्दै टिकट दिएपछि अन्य आकांक्षीले चर्को असन्तुष्टी जनाएका थिए । उक्त प्राइमरी इलेक्सनको नतिजामाथि अनेक प्रश्न उठेका थिए । 
एकथरिले डा. लेखजंगले आर्थिक चलखेल गरेर टिकट हात पारेको आरोप लगाउने गरेका छन् । 
यसरी विभिन्न विवाद र पार्टीका पुर्व दुई नेता नै उम्मेदवार भएकाले लेखजंगको महोल विस्तारै खस्किंदै गएको अन्य दलका उम्मेदवारहरुको भनाई छ । पछिल्लो समय देशका विभिन्न भागबाट रास्वपा स्थापनाकालका नेताहरु पार्टीभित्र आर्थिक बेथिति, अपारदर्शिता र बिसंगती हावी भएको भन्दै धमाधम पार्टी छाड्ने क्रमले पनि त्यसको मनोवैज्ञानिक प्रभाव सबै क्षेत्रमा पर्दा रास्वपाको महोल घट्दै गएको जेवी गुप्ता बताउंछन् ।  
तर लेखजंग भने आफ्नो पक्षमा माहोल राम्रो भएको दावी गर्छन् । 
कांग्रेस आन्तरिक गुटबन्दीका कारण पूर्ण रूपमा एकजुट हुन् नसकेको टिप्पणी छ । यस्तो, अवस्थामा एमालेको परम्परागत मत, घिमिरेको व्यक्तिगत प्रभाव र घिमिरेलाई समर्थन गरेका अन्य दल तथा उम्मेवादरको प्रभावका कारण उनी अग्रस्थानमा रहने आँकलन गरिएको छ ।