बुटवल । राष्ट्रिय स्वतन्त्र पार्टीका सांसद एवं पूर्वमन्त्री दीपक साहले गृहमन्त्रीका विषयमा पार्टीले देश र जनतालाई हेरेर निर्णय गर्नेमा आशावादी रहेको बताएका छन् ।
उनले पार्टीले ‘कसैलाई काखा र कसैलाई पाखा’ नगर्नेमा पनि आशावादी रहेको बताएका छन् ।
गृहमन्त्री सुधन गुरुङ सम्पत्ति सम्बन्धी विवादमा मुछिएका विषयमा लोकान्तरसँग कुरा गर्दै उनले सरकार र पार्टीले राम्रै निर्णय लिन्छ होला भन्नेमा आफू आशावादी रहेको बताए ।
‘राम्रै निर्णय लिन्छ होला; पार्टीको लागि पनि, संसद्को लागि पनि र देशको लागि पनि । आशाका छ कि पार्टीले तीन करोड जनतालाई हेरेर निर्णय गर्छ । कसैलाई काखा, कसैलाई पाखा गर्दैन’, उनले भने ।
मन्त्री भएका बेला साह एउटा विवादमा मुछिएपछि रास्वपाको सिफारिसमा प्रधानमन्त्री बालेन्द्र शाहले बर्खास्त गरेका थिए । उनलाई स्पष्टीकरण सोध्ने मौका समेत दिइएको थिएन ।
तर, आफ्नो भन्दा पनि गम्भीर विषयमा गृहमन्त्री गुरुङ विवाद पर्दा पनि फिर्ता नबोलाएका विषयमा पूर्वमन्त्री साह असन्तुष्ट रहेको बताइन्छ । उनले मंगलबार बिहान सामाजिक सञ्जालमा ‘स्पष्टीकरण...’ लेख्दै सांकेतिक विरोध जनाएका थिए ।
