काठमाडौं । संघीय संसद्का सांसदहरूको बायोमेट्रिक विवरण संकलन कार्य थालिएको छ । प्रतिनिधिसभा र राष्ट्रियसभा बैठकहरूमा उपस्थितिको हाजिरी विद्युतीय माध्यमबाट अभिलेखन गर्ने प्रयोजनका निम्ति बिहीबार (वैशाख २४)देखि यो कार्य सुरु गरिएको हो ।
संघीय संसद्का विषयगत समितिहरू अन्तर्राष्ट्रिय सम्बन्ध र पर्यटन, विकास, आर्थिक मामिला तथा सुशासन, अर्थ, विधायन व्यवस्थापन समितिका सांसदहरूको बायोमेट्रिक विवरण संकलन कार्य सकिएको छ ।
यस्तै, उद्योग तथा वाणिज्य र श्रम तथा उपभोक्ता हित, कानुन, न्याय तथा मानव अधिकार समितिका सांसदहरूको विवरण संकलनको कार्य भइरहेको संघीय संसद् सचिवालयले जनाएको छ ।
शुक्रबार (वैशाख २५) कृषि, सहकारी तथा प्राकृतिक स्रोत, संघीयता सबलीकरण तथा राष्ट्रिय सरोकार, पूर्वाधार विकास, सार्वजनिक नीति तथा प्रत्योजित विधायन, महिला तथा सामाजिक मामिला, राज्यव्यवस्था तथा सुशासन समिति सदस्यका उक्त विवरण संकलन गरिनेछ ।
यस्तै, वैशाख २८ गते सार्वजनिक लेखा र शिक्षा, स्वास्थ्य तथा सूचना प्रविधि समितिका सांसदहरूको उक्त विवरण संकलन गरिने संसद् सचिवालयले जनाएको छ । न्युज एजेन्सी नेपाल
