परासी । नवलपरासीका पत्रकारहरुले जिल्ला प्रशासन कार्यालय (सीडीओ कार्यालय) मा धर्ना दिएका छन् ।
सञ्चारमाध्यममाथि गरिएको विभेदपूर्ण निर्णय खारेजीको माग गर्दै केन्द्रीय समितिको आव्हानमा नेपाल पत्रकार महासंघ जिल्ला शाखा नवलपरासीले प्रशासन कार्यालयमा एक घण्टा धर्ना दिएको हो ।
सरकारी विज्ञापन निजी सञ्चारमाध्यममा नदिई सरकारीमा मात्रै सीमित गरेपछि महासंघले त्यसको विरोध गर्दै आएको छ । सरकारको यो कदमले प्रेस तथा अभिव्यक्ति स्वतन्त्रताको अन्तर्राष्ट्रिय मान्यता, नेपालको संविधानले सुनिश्चित गरेको पूर्ण प्रेस स्वतन्त्रता, सूचना र सञ्चारको हकमाथि हनन भएको जनाउँदै महासंघको विरोध कार्यक्रमअनुसार धर्ना दिइएको हो ।
धर्ना कार्यक्रमपछि आयोजित कार्यक्रममा बोल्दै जिल्ला शाखाका कार्यवहाक अध्यक्ष विकास अधिकारीले राजाको शासन कालमासमेत मिडियामाथि यस्तो आर्थिक बन्देज नरहेको जनाउँदै दुई तिहाइ नजिकको सरकारले प्रेसमाथि गरेको विभेदपूर्ण निर्णयले लोकतन्त्र माथि नै प्रश्न उठाएको बताए ।
