बुटवल । कपिलवस्तु क्षेत्र नं ३ बाट निर्वाचित नेपाली कांग्रेसका सांसद अभिषेकप्रताप शाहविरूद्व पक्राउ पुर्जी जारी भएको छ । शाहमाथि कृष्णनगर उद्योग वाणिज्य संघका अध्यक्ष सिताराम शर्मामाथि आक्रमणको आरोप थियो । कपिलवस्तुको कृष्णनगरमा भएको सामुहिक आक्रमणमा सांसद शाह जोडिएको आरोपमा शाहविरूद्व जाहेरी दर्ता भएको थियो । सोही जोहरीका आधारमा जिल्ला अदालत कपिलवस्तुले पक्राउ पुर्जी जारी गरेको हो ।
कुटपिटको घटनामा शाहविरूद्व मुद्दा दर्ता भएर कानुनी प्रकृया अघि बढेको कपिलवस्तु प्रहरीका सूचना अधिकारी डिएसपी रिपेन्द्रकुमार सिंहले बताए । आक्रमणमा संलग्न व्यक्तिहरुविरुद्ध जाहेरी दिन जाँदा प्रहरीले आलटाल गरेको पीडित पक्षले गुनासो गरेका थिए ।
संघीय सांसद शाह र कृष्णनगर नगरपालिकाका नगरप्रमुख रजतप्रताप शाहसहित १५–२० जनाको समूह आफ्नो निवासमा प्रवेश गरेर अन्धाधुन्ध कुटपिट गरेको पीडित शर्माको दाबी छ ।
