बुटवल । बुटवलकी नाबालिगमाथि सामूहिक बलात्कार भएको छ । बुटवलकी १४ बर्षीया नाबालिगमाथि कपिलवस्तुको बाणगंगा नगरपालिका चार नम्बरमा बाणगंगाका तीन जना युवाहरुले सामूहिक बलात्कार गरेका हुन् ।
बलात्कार गर्ने युवाहरू १ जना नाबालक १७ वर्षको, एक जना १८ वर्षको र अर्का २३ वर्षको रहेको प्रहरीले जनाएको छ । उनीहरु वाणगङ्गा नगरपालिका वडा नम्बर ९ का पडेरियाका रहेको खुलेको छ ।
यो घटना साउन ५ गते रातिको हो । युवाहरूले नाबालिगलाई जाँड खुवाएर बलात्कार गरेको प्रहरीमा दिएको जाहेरीमा उल्लेख गरिएको छ । बाहिर खाजा खाने निहुँमा छ्याङ भन्दै मदिरा खुवाएपछि युवाहरूले होटलमा लगेको बुझिएको छ ।
चार नम्बर चोककै एक होटलमा युवाहरूले उनलाई लगेका हुन् । पहिला दुई जना युवाहरू मात्रै संलग्न रहेका थिए र बलात्कारपछि नाबालिग बेहोस भएपछि उनीहरूले नाबालिगलाई होटलमै छोडेर घर गएका थिए । होटलवालाले त्यो केटी एक्लै छ भन्ने थाहा पाएपछि पटक पटक फोन गरेर ती युवाहरूलाई बोलाएको बताइएको छ ।
नाबालिगको सम्पर्कमा रहिरहने केटा साथी घरमा फोन अफ गरेर सुतेपछि उसको साथीलाई होटलवालाले होटलमा बोलाएको बताइएको छ । होटलमा त्यो साथीले अर्को कुनै साथी लिएर आएको र बलात्कारपछि एक जना फेरि घर फर्केको स्रोतले बताएको छ । नाबालिगसँग रातभर बिताएको युवक उनका प्रेमीका साथी थिए । त्यो कुरा पीडित नाबालिगलाई अर्को दिन ६ गते बिहान विस्तारबाट उठ्दा मात्र थाहा भयो ।
त्यसपछि नाबालिग बुटवल फर्किइन् । फर्किनासाथ उनले परिवारमा कुरा गरेपछि इलाका प्रहरी कार्यालय बुटवलमा जाहेरी दिन गएको र बुटवल प्रहरीले घटना बाणगंगाको भएकाले जाहेरीका लागि इलाका प्रहरी कार्यालय पिपरामा पठाएको बताईएको छ ।
बलात्कार भएको भोलिपल्ट युवतीले इलाका प्रहरी कार्यालय पिपरामा जाहेरी दिएपछि यो तथ्य बाहिर आएको हो । नाबालिगको जाहेरीको आधारमा अहिले बलात्कार गर्ने युवकहरू पक्राउ परिसकेका छन् । एक जनालाई साउन ७ गते र अरु २ जनालाई ८ गते पक्राउ गरी म्याद थप गरी राखिएको प्रहरीले जानकारी गराएको छ । बलात्कारीमाथि कानुन अनुसार कारबाही प्रकृया अघि बढाउने प्रहरीको भनाई छ ।
