बुटवल । पूर्वप्रधानमन्त्री बाबुराम भट्टराई लगायत नेताहरुले स्थापना गरेको प्रगतिशील लोकतान्त्रिक पार्टी विभाजित भएको छ । भट्टराई सहित पूर्वमाओवादी नेता जनार्दन शर्मा, पूर्व रास्वपाका नेता सन्तोष परियारलगायतले प्रलोपा स्थापना गरेका थिए । गत फागुनको चुनावमा शुन्य सिटमा सीमित भएको यो पार्टीबाट सुदन किराँती, ओजस्वी भट्टराई लगायतका नेताहरु यसअघि नै बाहिरिसकेका थिए । बाँकी रहेका अध्यक्ष परिषद्मा रहेका दुर्गा सोब र सन्तोष परियार पनि छुट्टिने सहमति गरेका छन् ।
सहमति अनुसार बाबुराम भट्टराईले प्रलोपा स्थापना हुनअघि बनाएको नेपाल समाजवादी पार्टी नयाँ शक्तीको नेतृत्व दुर्गा सोबले गर्ने छिन् । यो पार्टीको चुनाव चिह्न आँखा नै हुने सहमति भएको छ ।
सन्तोष परियारको पार्टी प्रलोपा नै हुने सहमति भएको छ । चुनाव चिह्न आँखाबाहेकको तीन रङको हुने गरी प्रक्रिया थाल्ने सहमति भएको छ नेतृ दुर्गा सोबले बताइन् ।
