बुटवल । निजी क्षेत्रबाट निरन्तर प्रकाशित पहिलो राष्ट्रिय दैनिक लुम्बिनीको सह-सम्पादकमा टोपराज (टिआर) शर्मा नियुक्त भएका छन् । सिद्धार्थ पब्लिकेसन्स प्रालि सञ्चालक समितिको बैठकले शर्मालाई सह-सम्पादकमा नियुक्त गर्ने निणर्य गरेको हो ।
२०६१ सालदेखि पत्रकारितामा निरन्तर क्रियाशील शर्माले पुर्वाञ्चल विश्वविद्यालयबाट पत्रकारिता विषयअन्तर्गत मिडिया म्यानेजमेन्ट टेक्नोलोजीमा स्नातकोत्तर गरेका छन् । शर्मा यसअघि २०७१ देखि २०७३ सम्म पनि दैनिक लुम्बिनीमा आबद्ध थिए ।
यसैगरी, सिद्धार्थ पब्लिकेसन्स प्रालिअन्तर्गत प्रकाशित लुम्बिनी पत्रिका अनलाइनको संयोजकमा आचार्य प्रदीपलाई जिम्मेवारी दिइएको छ ।
त्यसैगरी, प्रालिको बजार व्यवस्थापकमा सुवर्ण काफ्लेलाई जिम्मेवारी दिएको प्रबन्ध सञ्चालक महेश रिजालले जानकारी दिए ।
प्रालि सञ्चालक समितिले एक कार्यक्रमका बीच तीनै जनालाई संस्थामा स्वागत गरेको छ ।
सो अवसरमा प्रालिका अध्यक्ष मोहन चापागाईं, सम्पादक शेरबहादुर केसी, सल्लाहकार एवं पूर्व अध्यक्ष एमबी विश्वकर्मा र प्रबन्ध सञ्चालक महेश रिजालले शर्माको नियुक्तिसँगै पत्रिका थप परिस्कृत हुने विश्वास व्यक्त गरे । उनले पत्रिकाकाे अनलाइनलाई थप परिस्कृत बनाउनमा आचार्यले भूमिका खेल्ने उल्लेख गरे।
नवनियुक्त सह-सम्पादक शर्माले समाजप्रति जिम्मेवार, जवाफदेही रहेर आम नागरिकका रूचि अपेक्षालाई मनन् गरी मर्यादित पत्रकारितालाई निरन्तरता दिने प्रतिबद्धता व्यक्त गरे ।
