बुटवल । नेकपा एमाले रूपन्देही जिल्ला अध्यक्षमा यज्ञ गैरे निर्विरोध निर्वाचित भएका छन् । अध्यक्षमा तीन जनाको उम्मेदवारी परेको थियो । निवर्तमान अध्यक्ष तेजेन्द्र केसी र खेमप्रसाद लुइँटेलले शुक्रबार दिउँसो उम्मेदवारी फिर्ता लिएपछि गैरे निर्विरोध भएका हुन् । उनी यसअघि सचिव थिए ।
त्यस्तै उपाध्यक्षमा हितराज पन्थी, सचिवमा चित्रबहादुर कार्की र उपसचिव खुल्लामा बाबुराम पन्थी तथा महिलामा सुनिता ठटेर पनि निर्विरोध निर्वाचित भएका छन् । पन्थी यसअघि उपसचिव थिए । कार्की सैनामैना नगरपालिकाका पूर्वप्रमुख हुन् । उपाध्यक्षमा नरबहादुर घर्ती र हिरा केवट राहुलले पनि उम्मेदवारी दिएर फिर्ता लिएका थिए ।
त्यस्तै सचिवमा कार्कीसँगै महेन्द्रप्रसाद लिगलले दाबी गरेका थिए । लिगलले फिर्ता लिएपछि कार्की निर्विरोध भएका हुन् ।
दुईजनाका लागि उपसचिवमा ८ जनाको उम्मेदवारी परेको थियो । ५ पदाधिकारीसहित भुगोल, खुल्ला, जनजाती, महिला, दलित, पेसागत संगठनसहित १ सय ६९ जना निर्वाचित भएको प्रमुख निर्वाचन अधिकृत धर्मबहादुर खड्काले बताए ।
एमालेको १० औं जिल्ला अधिवेशन बुधबार उद्घाटन भएको थियो । बिहीबार दिनभर सहमतिको प्रयास भएको थियो । शुक्रबार सबै पदहरुमा सर्वसम्मत गराएर घोषणा गरिएको हो ।
सर्वसम्मत गराउनका लागि एमाले केन्द्रीय उपाध्यक्ष विष्णु पौडेल, सचिव छविलाल विश्वकर्मा, पद्मा अर्याल, पोलिटब्युरो सदस्य लीला गिरी, दलबहादुर रानालगायतका नेताले पहल गरेका थिए ।
