बुटवल । नेपाल पत्रकार महासंघले जेठ २६ गते तोकेको तीन तहकै निर्वाचन स्थगित गरेको छ । सदस्यताको टुंगो नलागेपछि निर्वाचन हुन नसकेको हो ।
शुद्धिकरणका नाममा पत्रकारिता गरिरहेकालाई सदस्य हटाउने र गैरपत्रकारलाई नयाँ सदस्यता दिएको विवाद छ । साे विवादले महासंघमा तालाबन्दी भएको छ ।
अधिवेशनपछि निर्वाचनबाट नयाँ नेतृत्व चयन हुनुपर्नेमा निर्वाचन नै अनिश्चित भएको हो । पत्रकार महासंघका अध्यक्ष विपुल पोखरेलले विज्ञप्ती जारी गर्दै २६ गतेको मतदान कार्यक्रम स्थगित भएको बताएका छन् । उनले निर्वाचन असार दोस्रो साता हुन सक्ने बताएका छन् ।
यता महासंघ संस्था दर्ता नविकरण नै नभएकाे भन्ने चर्चा सामाजिक सञ्चालमा चलेको छ । संस्था नविकरण नै नभएपछि महासंघ नामक संस्थाकै बैधानिकतामाथि सदस्यहरुले प्रश्न उठाएका छन् । महासंघको नेतृत्वको गम्भिर लापर्बाहीले संस्था कमजोर भएको आरोप सदस्यहरुको छ ।
महासंघ केन्द्रमा अध्यक्ष पोखरेल र महासचिव रोशन पुरी बाहेकका अन्य पदाधिकारी तथा सदस्यहरु शुद्धिकरण र नया सदस्यताका विषयमा विपक्षमा रहेका छन् । केन्द्रले निर्वाचन समिति बनाउन जिल्ला र प्रदेशलाई परिपत्र गरे पनि अधिकांशले पालना गरेका छैनन् । निर्वाचन समिति गठन नहुदासम्म निर्वाचन हुन सक्दैन । अहिले सबै तहका महासघका समितिहरु कामचलाउ अवस्थामा रहेका छन् ।
