बुटवल । भैरहवाका शिशिर गुरुङ र बुटवलका सञ्जय कार्की भैरहवामा जारी आठौंं रुपन्देही जिल्लास्तरिय मेयरकप स्नुकर प्रतियोगिताको फाइनलमा प्रवेश गरेका छन् । भैरहवास्थित क्रेजि क्यु क्लब हाउसमा जारी प्रतियोगितामा आइतबार सम्पन्न सेमिफाइनलमा कुनाल श्रेष्ठलाई ४–३ ले हराउंदै शिशिर तथा सञ्जयरत्न बज्राचार्यलाई ४–२ले हराउंदै सञ्जय कार्की फाइनलमा पुगेका हुन् ।
रुपन्देही पुल तथा स्नुकर संघको आयोजना तथा सिद्धार्थनगर नगरपालिकाको सहयोगमा जारी प्रतियोगिताको फाइनल खेल मंगलबार बिहान ९ बजेदेखि शुरु हुने खेल संयोजक एवं संघका सल्लाहकार विजय थापाले जानकारी दिए ।
प्रतियोगिताको उपाधि विजेताले नगद ६१ हजार रुपैया, तथा उपविजेताले नगद २५ हजार रुपैया, कप, मेडल, प्रमाणपत्रबाट पुरस्कृत गरिने छ ।
यसैगरि सर्वाधिक ब्रेकरले नगद १० हजार रुपैया, र कपबाट पुरस्कृत गरिने खेल संयोजक थापाले बताए ।
यसअघि संघको आयोजनामा सात वटा जिल्लास्तरीय प्रतियोगिता बुटवलमा भइसकेकामा यसपटक भैरहवामा आयोजित प्रतियोगिताले भैरहवा क्षेत्रका खेलाडीहरुमा उत्साह बढेको संघका अध्यक्ष सुजन पुनले बताए ।
फाइनल खेलसंगै प्रतियोगिताको समापन र पुरस्कार वितरण तथा सहयोगी संघसंस्था र व्यक्तिलाई सम्मान गरिने संघका अध्यक्ष पुनले बताए ।
