बुटवल । नेपालमा हुने दक्षिण एसियाली फुटबल महासंघ (साफ) महिला च्याम्पियनसिप फुटबल प्रतियोगिताको तयारी पूरा भएको छ ।
मंगलबार अखिल नेपाल फुटबल संघ (एन्फा) ले पत्रकार सम्मेलन गरी १ देखि १४ कात्तिकसम्म दशरथ रंगशालामा हुने प्रतियोगिताको सम्पूर्ण तयारी पूरा भएको जनाएको हो ।
एन्फा प्रवक्ता सुरेश शाहले प्रतियोगितामा आयोजक नेपालसहित भारत, माल्दिभ्स, पाकिस्तान, श्रीलंका, भुटान र बंगलादेश सहभागी हुने बताए । उनका अनुसार प्रतियोगिताका लागि पाकिस्तान, माल्दिभ्स र बंगलादेशको टोली नेपाल आइसकेका छन् भने भारत र भुटानको टोली भोलि (बुधबार) काठमाडौं आइपुग्ने छन् ।
सहभागी टोलीलाई एन्फा कम्प्लेक्सको खेल मैदान, नेपाली सेनाको भद्रकाली र लगनखेल खेल मैदान तथा सेन्ट जेभियर्सको खेल मैदानमा प्रशिक्षण गर्ने व्यवस्था गरिएको एन्फा प्रवक्ता शाहले जानकारी दिए । प्रतियोगिताको टिकेटिङ्ग अधिकार भने माउन्ट एभरेष्ट स्पोर्ट्स एण्ड इभेन्ट्सलाई प्रदान गरिएको छ ।
प्रतियोगिताको समूह चरणका खेलको टिकट दर साधारण प्याराफिटतर्फ तीन सय र भीआईपीतर्फ पाँच सय तोकिएको छ । त्यस्तै, नकआउट चरणका खेलहरूको टिकट दर साधारण प्याराफिटतर्फ पाँच सय र भीआईपीतर्फ एक हजार रुपैयाँ कायम गरिएको छ । प्रतियोगिताका खेल हेर्न १० वर्षसम्मका सबै बालबालिकालाई निःशुल्क प्रवेश दिइने एन्फाले जनाएको छ ।
