बुटवल । नेपाल प्रिमियर लिग (एनपीएल)को खेल हेर्न चितवन राइनोजले आफ्ना समर्थकलाई चितवनदेखि काठमाडौंसम्म निःशुल्क बसको व्यवस्था गर्ने भएको छ ।
चितवनले बुधबार सामाजिक सञ्जालमार्फत काठमाडौं आएर आफ्नो टिमको खेल हेर्न चाहने समर्थकलाई चितवनदेखि काठमाडौं ल्याउन पाँच वटा बसको व्यवस्था गरेको जनाएको हो ।
क्लबका अनुसार काठमाडौं आउन चाहने समर्थकले चिवतनको चितवन मेडिकल कलेज (सीएमसी) देखि बस पाउने छन् । प्रतियोगितामा चितवनको मार्की खेलाडीमा कुशल मल्ल छन् । यस्तै, टोलीको मुख्य प्रशिक्षकमा उमेश पटवाल छन् । चितवनले मंसिर १७ गते काठमाडौं गुर्खाजसँग खेल्दै प्रतियोगिताको सुरुआत गर्नेछ ।
