नेपाल प्रिमियर लिग (एनपीएल)मा आज (बुधबार) दुई खेलमा चार टोली मैदान उत्रिँदा सबै टिम पहिलो जितको खोजीमा हुनेछन् ।
कीर्तिपुरस्थित त्रिवि क्रिकेट मैदानमा हुने पहिलो खेलमा काठमाडौं गुर्खाजविरुद्ध कर्णाली याक्सले खेल्नेछ । प्रतियोगितामा दुवै टिमको यो दोस्रो खेल हो । दुवै टिम आज पहिलो जितको खोजीमा छन् ।
यसअघि पहिलो खेलमा कर्णाली याक्स जनकपुर बोल्ट्ससँग आठ विकेटले पराजित भएको थियो । काठमाडौं गुर्खाजलाई चितवन राइनोजले पाँच विकेटले पराजित गरेको थियो ।
यी दुई टिमबीचको खेल बिहान ९ बजेदेखि सुरु हुनेछ । खेलमा कर्णाली याक्स सोमपाल कामीको र काठमाडौं गुर्खाज करण केसीको कप्तानीमा मैदान उत्रिने छ । यी दुवै खेलाडी राष्ट्रिय क्रिकेट टिमका नियमित सदस्य हुुन् ।
आजको दोस्रो खेलमा लुम्बिनी लायन्स र विराटनगर किंग्सबीच प्रतिस्पर्धा हुनेछ । प्रतियोगितामा लुम्बिनीको यो पहिलो खेल हो । यस्तै, विराटनगरको भने यो तेस्रो खेल हो ।
विराटनगर आज पहिलो जितको खोजीमा छ । यसअघि विराटनगर पहिलो खेलमा जनकपुर बोल्ट्ससँग आठ विकेटले र दोस्रो खेलमा चितवन राइनोजसँग ८७ रनले पराजित भएको थियो ।
त्रिवि क्रिकेट मैदानमै हुने यो खेल दिउँसो १ बजेदेखि सुरु हुनेछ । खेलमा लुम्बिनीको रोहितकुमार पौडेल र विराटनगर सन्दीपको कप्तानीमा मैदान उत्रिनेछ । रोहित हाल राष्ट्रिय टिमका कप्तान हुन् । यस्तै, सन्दीप राष्ट्रिय टिमका पूर्व कप्तान हुन् ।
मंसिर १५ गतेदेखि सुरु भएको प्रतियोगितामा कुल आठ टिमको सहभागिता छ । २१ दिनसम्म चल्ने प्रतियोगिताको फाइनल खेल पुस ६ गते हुनेछ ।
