भैरहवा । श्री रुपन्देही लीलाराम न्यौपाने मा.वि ले ६९औं वार्षिकोत्सव तथा अभिभावक दिवसको अवसरमा शिक्षक तथा कर्मचारी स्तरीय ब्याडमिन्टन प्रतियोगिता २०८१ को आयोजना गरेको छ ।
विद्यालयले नगरमै पहिलो पटक सिद्धार्थनगर नगरपालिका भित्र सामुदायिक विद्यालयमा कार्यरत शिक्षक र कर्मचारी विचको मैत्री भावनासँगै सम्बन्ध प्रगाढ बनाउदै र खेलकुदमा शिक्षकको सहभागिता रहोस भन्ने उद्धेश्यकले खेलको आयोजना गरिएको विद्यालयका प्राचार्य रुपकुमार रायमाझीले बताए । उनले यो खेलको माध्यमबाट सहयोगको भावना तथा भातृत्वको भावना बिकास हुने अपेक्षा समेत रहेको बताए ।
सधै अध्यापनमात्रै गराउनु भन्दा स्वास्थ्यका लागि खेलकुद भन्ने अभिप्रायले मनोरञ्जन सहितको पुर्नताजगीका लागि नगर भित्रका शिक्षक र कर्मचारी बीच यो प्रतियोगिता आयोजना गरिएको हो । दुई दिन हुने प्रतियोगितामा सिद्धार्थनगर नगरपालिका भित्रका १० सामुदायिक विद्यालयमा कार्यररत ४५ जना शिक्षक र कर्मचारीहरु सहभागी भएको विद्यालयका अतिरिक्त क्रियाकलाप समिति संयोजक भोजराज पौड्यालले जानकारी दिए ।
प्रतियोगिताको उद्घाटन गर्दै सिद्धार्थनगर नगरपालिकाको उप–प्रमुख उमा अधिकारीले यस किसीमको प्रतियोगिता हरेक विद्यालयहरुले गर्नुपर्ने बताईन । विद्यार्थीहरु बीच प्राय भइरहने यस्तो प्रतियोगिता शिक्षकहरुबीच गर्दा एक अर्का विद्यालय विचको सामिप्यता बढ्ने बताइन ।
प्रतियोगिता एकल महिला, एकल पुरुष, जोडी महिला, जोडी पुरुष र जोडी संयुक्त गरि पाच विधामा खेलाइएको छ । प्रतियोगिता मंसिर २२ गते शनिबार समापन हुनेछ ।
